4ம் எண் கூண்டு அதனையொட்டி, புதுச்சேரி துறைமுகத்தில் 4ம் எண் புயல் எச்சரிக்கை கூண்டு ஏற்றப்பட்டுள்ளது. கடந்த இரு தினங்களாக கடல் சீற்றமாக உள்ளதால், மீனவர்கள் கடலுக்கு செல்லாமல், படகுகளை பாதுகாப்பாக கரையில் நிறுத்தி வைத்துள்ளனர்.

விடுமுறை அறிவிப்பு கனமழை எச்சரிக்கையை தொடர்ந்து மாநிலத்தில் உள்ள அனைத்து பள்ளி மற்றும் கல்லுாரிகளுக்கு இன்று 29ம் தேதி விடுமுறை விடுத்து கல்வித்துறை அமைச்சர் நமச்சிவாயம் உத்தரவிட்டுள்ளார்.

என்.டி.ஆர்.எப்., வருகை மாவட்ட நிர்வாகத்தின் அழைப்பை ஏற்று, அரக்கோணத்தில் இருந்து நேற்று புதுச்சேரிக்கு வந்த தேசிய பேரிடர் மீட்பு குழு வீரர்கள் 60 பேரை, கலெக்டரை சந்தித்து ஆலோசனை நடத்தினர். அதேபோன்று, 30 பேர் கொண்ட தேசிய பேரிடர் குழு இன்று காரைக்கால் செல்கிறது.

கட்டுப்பாட்டு அறைகள் துவக்கம் மாவட்ட நிர்வாகம் சார்பில் அனைத்து துறை அதிகாரிகளுடன் இணைந்து நிலமையை தொடர்ந்து கண்காணித்திட 24 மணி நேரமும் இயங்கக்கூடிய கட்டுப்பாட்டு அறைகள் தொடங்கப்பட்டுள்ளது. புயல் மற்றும் மழை தொடர்பாக தகவல்களை கட்டணமில்லா தொலைபேசி எண்கள் 112, 1070 மற்றும் 1077 ஆகிய எண்களில் தெரிவிக்கலாம்.

கடந்த மழைக்காலங்களில் மழை நீர் தேங்கிய 70 இடங்களை கண்டறிந்து, பொதுப்பணி மற்றும் உள்ளாட்சி துறை மூலம் மழை நீரை வெளியேற்ற ராட்சத மோட்டார்கள் மற்றும் 46 பொக்லைன்கள் தயார் நிலையில் வைக்கப்பட்டுள்ளது.

பாதுகாப்பு மையங்கள் தாழ்வான பகுதிகளில் உள்ள மக்களை பாதுகாப்பாக தங்க வைக்க 312 மையங்கள் தயார் நிலையில் வைக்கப்பட்டுள்ளது. பொதுமக்களுக்கு உணவு வழங்க குடிமைப் பொருள் வழங்கல் துறை சார்பில் ஏற்பாடு செய்யப்பட்டுள்ளது.

அவசர கால மீட்பு குழு வருவாய், பொதுப்பணி, மின்துறை, போலீஸ், தீயணைப்பு உள்ளிட்ட அனைத்து துறை அதிகாரிகள் கொண்ட அவசர கால மீட்பு குழு 16 குழுக்கள் தயார் நிலையில் உள்ளது. பொதுமக்கள் அவசர உதவிக்கு கட்டுப்பாட்டு அறைகளை தொடர்பு கொள்ளலாம்.

கவர்னர் உத்தரவு இந்நிலையில் நேற்று மாலை கவர்னர் கைலாஷ்நாதன் தலைமையில் அனைத்து துறை அதிகாரிகளின் ஆய்வு கூட்டம் நடந்தது. கூட்டத்தில், அரசு சார்பில் எடுக்கப்பட்டுள்ள முன்னெச்சரிக்கை நடவடிக்கைளை தலைமை செயலர் சரத் சவுகான், பேரிடர் மேலாண்மை துறை செயலர் கிருஷ்ண மோகன் உப்பு, கலெக்டர் குலோத்துங்கன் உள்ளிட்ட அனைத்து துறை அதிகாரிகள் விளக்கினர். புயல் மற்றும் மழை பாதிப்புகளில் இருந்து மக்களை பாதுகாத்திட உரிய நடவடிக்கை எடுத்திட கவர்னர் உத்தரவிட்டார்.

பொதுமக்கள் கவனத்திற்கு

கனமழை காரணமாக மின்சாரம் துண்டிக்கப்பட வாய்ப்புள்ளது. அதனால், தண்ணீர் தொட்டிகளை நிரப்பி வைக்கவும். டார்ச் லைட், இன்வெட்டர்களை சார்ஜ் செய்து வைக்கவும். மெழுகு வர்த்தி, தீப் பெட்டிகளை தயார் நிலையில் வைத்திருக்கவும்.

இரண்டு நாட்களுக்கு தேவையான பால், ரொட்டி, பிரட் உள்ளிட்ட உணவு பொருட்கள், குழந்தை மற்றும் முதியோர்களுக்கு தேவையான மருந்துகள் கையிருப்பில் வைத்துக் கொள்ளவும்.

அத்தியாவசிய தேவையின்றி மக்கள் வெளியே வர வேண்டாம்.