பி.ஆர்.சிவா (சுயேச்சை): புதுச்சேரி நகராட்சிக்கு சொந்தமான கடற்கரையில் உள்ள மேரி ஹால்முன்பு திருமண வரவேற்பு நடந்து வந்தது. இப்போது அனுமதி வழங்கப்படுகின்றதா.

முதல்வர் ரங்கசாமி: தற்போது பிரெஞ்சு குடியுரிமை சட்டத்தின்படி புதுச்சேரி நகராட்சிக்குட்பட்ட பகுதியில் வசிக்கும் மணமகன் அல்லது மணமகள் பிரெஞ்சு குடியுரிமை பெற்றிருந்தால் அவர்கள் திருமணத்தை பதிவு செய்ய அனுமதி வழங்கப்படுகிறது.

பி.ஆர்.சிவா: இந்த அனுமதிக்கு எவ்வளவு கட்டணம் வசூலிக்கப்படுகிறது.

முதல்வர் ரங்கசாமி: பிரெஞ்சு திருமண பதிவு அனுமதி வழங்கப்பட்டவர்களுக்கு கட்டணமாக ரூ. 50,500 மட்டுமே வசூலிக்கப்படுகிறது. மற்றவர்கள் திருமண வரவேற்பு நடத்துவதற்கு விண்ணப்பித்தால் பரிசீலனை செய்து அனுமதி வழங்க நடவடிக்கை எடுக்கப்படும்.

நேரு(சுயேச்சை): புதுச்சேரி மேரி ஹாலில் காலம் காலமாக திருமணங்கள் நடந்து வந்துள்ளன. பதிவு செய்யப்பட்டன. எனவே அங்குபிரெஞ்சு திருமணம் மட்டுமின்றி மற்றவர்களையும் அனுமதிக்க வேண்டும். பத்திரப்பதிவு துறையில் தற்போது திருமணம் நடந்தாலும் அதிக முக்கியத்துவம் தரப்படுவதில்லை.

நாஜிம் (தி.மு.க): காலம் காலமாக திருமண பதிவுகள் நகராட்சி, கொம்யூன் பஞ்சாயத்துகளில் நடந்து வந்துள்ளது.

மேரி ஹாலில் திருமணம் செய்ய பொதுமக்கள் ஆர்வம் காட்டினர். பல ஆண்டுகளாக நடந்து வந்த இந்த நடைமுறையை ஏன் மாற்றினர் என்று தெரியவில்லை.

முதல்வர் ரங்கசாமி: எம்.எல்.ஏ.,க்களின் கோரிக்கை தொடர்பாக பரிசீலனை செய்து நடவடிக்கை எடுக்கப்படும்.