புதுச்சேரியில் பெட்ரோல் மற்றும் டீசல் மீதான மதிப்புக்கூட்டு வரியை (வாட்), வரும் ஜனவரி 1ம் தேதி முதல் அதிகரிக்க அரசு முடிவு செய்துள்ளது. இந்த வாட் வரி உயர்விற்கு கவர்னர் கைலாஷ்நாதன் ஒப்புதல் அளித்துள்ளார்.

இதனால், புத்தாண்டு முதல் புதுச்சேரியில் பெட்ரோல், டீசல் விலை உயர்கிறது.

தற்போது, ​​புதுச்சேரியில் பெட்ரோல் விலை லிட்டருக்கு ரூ.94.26, காரைக்காலில் 94.03, மாகியில் 91.92, ஏனாமில் 94.92 ஆக உள்ளது. டீசல் விலை புதுச்சேரியில் ரூ.84.48, காரைக்காலில் 84.31, மாகியில் 81.90, ஏனாமில் ரூ.84.75 ஆக உள்ளது.

வாட் வரி உயர்வால் பெட்ரோல், டீசல் விலை ரூ.2 வரை அதிகரிக்கிறது.

புதுச்சேரி அரசின் வருவாயை உயர்த்தும் நோக்கில் வாட் வரி உயர்த்தப்பட்டுள்ளது. பெட்ரோல், டீசல் விலை உயர்வு புதுச்சேரி மக்களுக்கு அரசு அளித்துள்ள புத்தாண்டு பரிசு என, எதிர்க்கட்சிகள் விமர்சனம் செய்து வருகின்றன.