புதுச்சேரி, கோரிமேடு, பிரியதர்ஷினி நகர் பகுதியை சேர்ந்தவர் தமிழப்பன். இவரை வாட்ஸ் ஆப் மூலம் தொடர்பு கொண்ட மர்மநபர் ஆன்லைன் வர்த்தகத்தில் முதலீடு செய்து, அதிக பணம் சம்பாதிக்கலாம் என, கூறியுள்ளார்.

இதைநம்பி தமிழப்பன் மர்மநபர் தெரிவித்த ஆன்லைன் வர்த்தகத்தில் 1 லட்சத்து 81 ஆயிரத்து 355 செலுத்தி, அதன் மூலம் வந்த லாபப்பணத்தை எடுக்க முயன்றபோது, முடியவில்லை. அதன்பிறகே மோசடி கும்பலிடம் பணத்தை இழந்தது தெரியவந்தது.

தட்டாஞ்சாவடியை சேர்ந்த ஆரோக்கியநாதன் ஆன்லைன் மூலம் 1 லட்சத்து 20 ஆயிரத்திற்கு ரிச்சார்ஜபிள் பேட்டரி ஆர்டர் செய்துள்ளார்.

ஆனால், 15 ஆயிரம் ரூபாய் மதிப்பிலான சாதாரண பேட்டரி மட்டும் டெலிவரி செய்யப்பட்டது. இதன் மூலம் ஆரோக்கிய நாதனிடம் 1 லட்சத்து 5 ஆயிரம் ரூபாயை மோசடி கும்பல் ஏமாற்றியுள்ளது.

இதேபோல், கருவடிக்குப்பம் ரகுமான் 1 லட்சத்து 24 ஆயிரம், கனகசெட்டிக்குளம் விஜய் 37 ஆயிரம், வில்லியனுார் மணிமாறன் 3 ஆயிரத்து 500, வைத்திகுப்பம் பிரதீப்ராஜ் ஆயிரத்து 500, வில்லியனுார் சூசைராஜ் 3 ஆயிரத்து 500, ரெட்டியார்பாளையம் வெங்கடபரமானந்தம் 8 ஆயிரத்து 800 என, மொத்தம் 8 பேர் 4 லட்சத்து 64 ஆயிரத்து 655 ரூபாய் மோசடி கும்பலிடம் இழந்துள்ளனர்.

இதுகுறித்த புகாரின் பேரில், புதுச்சேரி சைபர் கிரைம் போலீசார் வழக்குப் பதிந்து விசாரித்து வருகின்றனர்.