விழுப்புரம் மாவட்டம், வானுார் அடுத்த புள்ளிச்சப்பள்ளம் காலனிக்கு நேற்று மதியம் சென்னையில் இருந்து சிலை கடத்தல் தடுப்பு பிரிவு போலீசார் 10 பேர் இரண்டு வாகனங்களில் வந்தனர்.

அவர்கள், அங்குள்ள செந்தாமரைக்கண்ணன் மகன் செல்வக்குமார்,38; வீட்டில் அதிரடியாக சோதனை நடத்தினர். அதில், வீட்டின் மாடியில் அட்டை பெட்டிகளில் பதுக்கி வைத்திருந்த நடராஜர், அம்மன், விநாயகர் உள்ளிட்ட 5 ஐம்பொன் சிலைகளை கண்டுபிடித்து பறிமுதல் செய்தனர்.

தொடர்ந்து, வீட்டில் இருந்து அதே பகுதியை சேர்ந்த இளையராஜா,30; உள்ளிட்ட இருவரை விசாரணைக்காக சென்னைக்கு அழைத்து சென்றனர். இச்சம்பவத்தால், அப்பகுதியில் பரபரப்பு நிலவியது.

பறிமுதல் செய்த ஐம்பொன் சிலைகள் செல்வக்குமார் வீட்டிற்கு எப்படி வந்தது. சிலை கடத்தலில் யார், யாருக்கு தொடர்பு உள்ளது என்பது குறித்து போலீசார் தீவரமாக விசாரித்து வருகின்றனர்.