இதுகுறித்து போக்குவரத்து எஸ்.பி., ரச்சனா சிங் விடுத்துள்ள செய்திக்குறிப்பு:

பொதுப்பணித்துறை சார்பில், காமராஜர் சாலை பாலாஜி தியேட்டர் அருகே உள்ள பழைய சேதமடைந்த உப்பனாறு குறுக்கு பாலம் இடிக்கப்பட்டு மறுகட்டமைப்பு செய்யும் பணிகள் இன்று (19ம் தேதி) முதல் துவங்குகிறது.

இதையொட்டி, பொதுமக்கள் மற்றும் வாகன ஓட்டிகள் நலனை கருத்தில் கொண்டு தற்காலிக போக்குவரத்து மாற்றங்கள் செய்யப்படுகிறது.

அதன்படி, காமராஜர் சாலையில் ராஜிவ் சதுக்கம் மற்றும் பெரியார் சதுக்கம் வழியாக வரும் நடுத்தர வாகனங்கள், பைக்குகள் வழக்கமான பாதையை பின்பற்றி புதிய பாலம் வழியாக ராஜா தியேட்டர் நோக்கி செல்லலாம். ராஜா தியேட்டரில் இருந்து பைக்குகள், புதிய பாலத்தில் அமைக்கப்பட்ட தடுப்புகளின் வழியாக பாலாஜி தியேட்டர், பெரியார் சிலை, ராஜிவ் சதுக்கம் நோக்கி செல்ல அனுமதிக்கப்படும்.

ராஜா தியேட்டரில் இருந்து வரும் மற்ற அனைத்து நடுத்தர மற்றும் இலகுரக வாகனங்கள், ஜி.ஆர்.டி., சந்திப்பில் வலப்புறம் திரும்பி வள்ளலார் சாலை,45 அடி சாலை, சாரம் அவ்வை திடல் வழியாக காமராஜர் சாலையை அடைய வேண்டும்.

ராஜா தியேட்டரில் இருந்து ஜி.ஆர்.டி., சந்திப்பு நோக்கி காமராஜர் சாலையில் எந்தவொரு கனரக வாகனங்களும் அனுமதிக்கப் படமாட்டாது. அவசர பயன்பாட்டு வாகனங்களை (ஆம்புலன்ஸ், தீயணைப்பு) தவிர்த்து, அனைத்து கனரக மற்றும் நடுத்தர வாகனங்கள் (பஸ்கள், கல்வி நிறுவன வாகனங்கள்) அஜந்தா சந்திப்பு வழியாக அண்ணா சாலை, காமராஜர் சாலையில் நுழைய அனுமதிக்கப்படாது.

அவை எஸ்.வி.பட்டேல் சாலையில் அஜந்தா சந்திப்பு, செஞ்சி சாலை, சோனம்பாளையம், சுப்பையா சாலை, மறைமலையடிகள் சாலை வழியாக நகரப்பகுதிகளை அடையலாம்.

எனவே, வாகன ஓட்டிகளும், பொதுமக்களும் தற்காலிக போக்குவரத்து மாற்றத்தை கடைப்பிடித்து, பாலம் பணிகள் முடியும் வரை போக்குவரத்து போலீசாருக்கு ஒத்துழைக்குமாறு கேட்டுக் கொள்கிறோம். இவ்வாறு கூறப்பட்டுள்ளது.