இந்தோனேஷியாவில், ஆசிய ஜூனியர் பாட்மின்டன் சாம்பியன்ஷிப் (கலப்பு அணி) தொடர் நடக்கிறது. இதன் 'டி' பிரிவு லீக் போட்டியில் இந்தியா, ஐக்கிய அரபு எமிரேட்ஸ் (யு.ஏ.இ.,) அணிகள் மோதின.

ஆண்கள் ஒற்றையர் முதல் போட்டியில் இந்தியாவின் ராஜுலு ராமு 11-5 என யு.ஏ.இ.,யின் மைஷா உமர் கானை வென்றார். பெண்கள் ஒற்றையர் பிரிவு முதல் போட்டியில் இந்தியாவின் தன்வி சர்மா 11-5 என மதுமிதாவை (யு.ஏ.இ.,) வீழ்த்தினார். பெண்கள் இரட்டையர் பிரிவு போட்டியில் இந்தியாவின் காயத்ரி, மன்சா ரவாத் ஜோடி 11-4 என யு.ஏ.இ.,யின் வைதேகி, மதுமிதா ஜோடியை தோற்கடித்தது.

முடிவில் இந்திய அணி 110-83 என்ற கணக்கில் வெற்றி பெற்றது. முதல் போட்டியில் இலங்கையை வீழ்த்திய இந்தியா, தொடர்ச்சியாக 2வது வெற்றியை பதிவு செய்து காலிறுதிக்கான இடத்தை உறுதி செய்தது. இந்திய அணி, தனது கடைசி லீக் போட்டியில் இன்று ஹாங்காங்கை எதிர்கொள்கிறது.