மலேசியாவில் சர்வதேச 'சூப்பர் 1000' பாட்மின்டன் தொடர் நேற்று துவங்கியது. ஆண்கள் ஒற்றையர் முதல் சுற்றில் இந்தியாவின் ஆயுஷ் ஷெட்டி 20, பாரிஸ் ஒலிம்பிக்கில் வெண்கலம் வென்ற, மலேசியாவின் ஜி ஜியா லீயை 27, எதிர்கொண்டார். முதல் செட்டை 21-12 என வசப்படுத்தினார் ஆயுஷ். தொடர்ந்து இரண்டாவது செட்டையும் 21-17 கைப்பற்றினார். முடிவில் ஆயுஷ், 21-12, 21-17 என்ற நேர் செட்டில் வெற்றி பெற்றார்.

இந்தியாவின் லக்சயா சென் 24, முதல் சுற்றில் சிங்கப்பூரின் ஜியா ஹெங்கை 25, சந்தித்தார். முதல் செட்டை 21-16 என வென்ற லக்சயா, அடுத்த செட்டை 15-21 என இழந்தார். பின், மூன்றாவது செட்டை 21-14 என கைப்பற்றினார். முடிவில் லக்சயா 21-16, 15-21, 21-14 என வென்று, இரண்டாவது சுற்றுக்கு முன்னேறினார்.

பெண்கள் ஒற்றையரில் இந்தியாவின் மாளவிகா 24, உலகின் 'நம்பர்-7' வீராங்கனை, தாய்லாந்தின் ரட்சனாக் இன்டனானிடம் 30, 11-21, 11-21 என எளிதாக தோற்றார்.

ஆண்கள் இரட்டையர் முதல் சுற்றில் இந்தியாவின் அம்சகருணன், அர்ஜுன் ஜோடி 10-21, 20-22 என ஜப்பானின் மிடோரிகவா, யமாஷிடா ஜோடியிடம் தோற்றது.