இந்திய ஓபன் 'சூப்பர் 750' பாட்மின்டன் தொடர் நேற்று டில்லியில் துவங்கியது. பெண்கள் ஒற்றையரில் ஒலிம்பிக்கில் இரண்டு பதக்கம் (வெள்ளி, வெண்கலம்) வென்ற இந்தியாவின் சிந்து, முதல் சுற்றில் தைவானின் ஷுவோ யங் சங்கை எதிர்கொண்டார். முதல் செட்டை சிந்து 21-14 என கைப்பற்றினார்.

இரண்டாவது செட் இழுபறி ஆனது. ஒருகட்டத்தில் 20-20 என இருந்தது. பின் அடுத்தடுத்து இரு கேம்களை வசப்படுத்திய சிந்து, 22-20 என செட்டை கைப்பற்றினார். முடிவில் சிந்து 21-14, 22-20 என வெற்றி பெற்றார்.

ஆண்கள் அபாரம்

ஆண்கள் இரட்டையர் முதல் சுற்றில் இந்தியாவின் சாத்விக்சாய்ராஜ், சிராக் ஷெட்டி, மலேசியாவின் வெய் சோங், கெய் உன் ஜோடியை சந்தித்தது. இதில் இந்திய ஜோடி 23-21, 19-21, 21-16 என்ற கணக்கில் வெற்றி பெற்றது.

பெண்கள் இரட்டையர் முதல் சுற்றில் இந்தியாவின் திரீஷா, காயத்ரி ஜோடி, 21-23, 19-21 என ஜப்பானின் இகராஷி, சுகுரமோட்டோ ஜோடியிடம் அதிர்ச்சி தோல்வியடைந்தது.

ஆண்கள் ஒற்றையரில் இந்தியாவின் கிரண் ஜார்ஜ், 21-19, 14-21, 27-25 என ஜப்பான் வீரர் டனாகாவை போராடி வென்றார்.