இந்தோனேஷியாவில், மாற்றுத்திறனாளிகளுக்கான சர்வதேச பாரா பாட்மின்டன் தொடர் நடந்தது. ஆண்கள் ஒற்றையர் 'எஸ்.எல். 4' பிரிவு பைனலில் இந்தியாவின் நவீன் சிவகுமார், இரண்டு முறை பாராலிம்பிக்கில் சாம்பியன் பட்டம் வென்ற பிரான்சின் லுாகாஸ் மசூர் மோதினர். இதில் நவீன் 17-21, 23-21, 21-12 என்ற கணக்கில் வெற்றி பெற்று தங்கப்பதக்கத்தை கைப்பற்றினார்.

பெண்கள் ஒற்றையர் 'எஸ்.யு. 5' பிரிவு பைனலில் இந்தியாவின் மணிஷா 12-21, 22-20, 21-14 என்ற கணக்கில் சகவீராங்கனை துளசிமதியை வீழ்த்தி தங்கம் வென்றார். இது, இந்த ஆண்டு மணிஷா கைப்பற்றிய 4வது தங்கம்.

பெண்கள் ஒற்றையர் 'எஸ்.எச். 6' பிரிவு பைனலில் இந்தியாவின் நித்ய ஸ்ரீ சுமதி சிவன் 21-14, 21-13 என பெருவின் போவேடாவை தோற்கடித்து தங்கத்தை தட்டிச் சென்றார்.

ஆண்கள் இரட்டையர் 'எஸ்.எல். 3-4' பிரிவு பைனலில் இந்தியாவின் சுகந்த் கடம், பிரமோத் பகத் ஜோடி 21-16, 21-12 என இந்தோனேஷியாவின் டிவியோகோ, செடியாவன் ஜோடியை வீழ்த்தி தங்கம் வென்றது.

இத்தொடரில் இந்தியாவுக்கு 6 தங்கம், 8 வெள்ளி, 14 வெண்கலம் என, மொத்தம் 28 பதக்கம் கிடைத்தது.