சிட்னியில், 'சூப்பர் 500' அந்தஸ்து பெற்ற ஆஸ்திரேலிய ஓபன் பாட்மின்டன் தொடர் நடக்கிறது. பெண்கள் ஒற்றையர் பிரிவு முதல் சுற்றில் இந்தியாவின் சிந்து, பெருவின் லுாசியா காஸ்டிலோ சலாசர் மோதினர். அபாரமாக ஆடிய சிந்து 21-13, 21-11 என்ற நேர் செட் கணக்கில் வெற்றி பெற்றார்.

மற்றொரு போட்டியில் இந்தியாவின் தான்வி சர்மா, செக்குடியரசின் சியு பின்-சியான் மோதினர். இதில் தான்வி சர்மா 21-12, 22-20 என வெற்றி பெற்று 2வது சுற்றுக்கு முன்னேறினார். இந்தியாவின் மாளவிகா பன்சோத் 15-21, 21-7, 21-13 என, தாய்லாந்தின் டோன்ருக் சேஹெங்கை வீழ்த்தினார்.

மற்றொரு முதல் சுற்றில் இந்தியாவின் இஷாராணி பருவா 22-20, 10-21, 21-14 என சீனாவின் ஹான் கியான்ஜியை தோற்கடித்தார். இந்தியாவின் தன்யா ஹேம்நாத் 21-17, 21-18 என, அமெரிக்காவின் இஷிகா ஜெய்ஸ்வாலை வென்றார். இந்தியாவின் ஆகர்ஷி காஷ்யப் 19-21, 21-19, 20-22 என, அமெரிக்காவின் லிங் சிங் வோங்கிடம் போராடி தோல்வியடைந்தார்.

ஆண்கள் ஒற்றையர் பிரிவு முதல் சுற்றில் இந்தியாவின் கிரண் ஜார்ஜ், அமெரிக்காவின் ஜஸ்டின் ஹோ மோதினர். இதில் ஏமாற்றிய கிரண் ஜார்ஜ் 19-21, 21-14, 15-21 என்ற கணக்கில் தோல்வியடைந்தார். இந்தியாவின் தருண் 21-18, 13-21, 23-25 என, சீனதைபேயின் சுன்-யி லின்னிடம் வீழ்ந்தார்.

கலப்பு இரட்டையர் பிரிவு முதல் சுற்றில் இந்தியாவின் துருவ் ரவாத், மணீஷா ஜோடி 21-13, 21-14 என, ஆஸ்திரேலியாவின் லிம் ஜெய்டன், விக்டோரியா ஜோடியை வீழ்த்தியது.