சீனாவில், 'சூப்பர் 1000' அந்தஸ்து பெற்ற சீன ஓபன் பாட்மின்டன் தொடர் நடக்கிறது. பெண்கள் ஒற்றையர் பிரிவு முதல் சுற்றில் இந்தியாவின் சிந்து, உன்னதி ஹூடா மோதினர். முதல் செட்டை 21-14 எனக் கைப்பற்றிய சிந்து, இரண்டாவது செட்டை 9-21 என இழந்தார். வெற்றியாளரை நிர்ணயிக்கும் மூன்றாவது செட்டில் எழுச்சி கண்ட சிந்து 21-10 என தன்வசப்படுத்தினார்.

மொத்தம் 56 நிமிடம் நீடித்த போட்டியில் சிந்து 21-14, 9-21, 21-10 என்ற செட் கணக்கில் வெற்றி பெற்று 2வது சுற்றுக்குள் நுழைந்தார்.

ஆண்கள் ஒற்றையர் பிரிவு முதல் சுற்றில் இந்தியாவின் ஆயுஷ் ஷெட்டி, உலகின் 'நம்பர்-11' இந்தோனேஷியாவின் ஆல்வி பர்ஹான் மோதினர். உலக தரவரிசையில் 23வது இடத்தில் உள்ள ஆயுஷ் 21-17, 5-21, 21-17 என்ற கணக்கில் வெற்றி பெற்றார்.

கலப்பு இரட்டையர் பிரிவு முதல் சுற்றில் இந்தியாவின் துருவ் கபிலா-தனிஷா கிராஸ்டோ, ரோஹன் கபூர்-ருத்விகா ஷிவானி ஜோடி தோல்வியடைந்தன. ஆண்கள் இரட்டையர் பிரிவு முதல் சுற்றில் இந்தியாவின் ஹரிகரன், அர்ஜுன் ஜோடி தோல்வியடைந்தது.