உ.பி., மாநிலம் லக்னோவில், சையது மோடி இந்தியா சர்வதேச பாட்மின்டன் தொடர் நடக்கிறது. பெண்கள் ஒற்றையர் பிரிவு 2வது சுற்றில் இந்தியாவின் சிந்து, இரா சர்மா மோதினர். மொத்தம் 49 நிமிடம் நீடித்த போட்டியில் சிந்து 21-10, 12-21, 21-15 என்ற கணக்கில் போராடி வெற்றி பெற்று காலிறுதிக்கு முன்னேறினார்.

மற்றொரு போட்டியில் இந்தியாவின் தஸ்னிம் மிர் 21-15, 13-21, 21-7 என சகவீராங்கனை அனுபமாவை வீழ்த்தினார். இந்தியாவின் மாளவிகா பன்சோத் 12-21, 15-21 என சகவீராங்கனை ஸ்ரீயான்ஷி வாலிஷெட்டியிடம் தோல்வியடைந்தார். இந்தியாவின் உன்னதி ஹூடா 21-18, 22-20 என தாய்லாந்தின் போர்ன்பிச்சா சோய்கீவோங்கை வீழ்த்தினார்.

ஆண்கள் ஒற்றையர் பிரிவு 2வது சுற்றில் இந்தியாவின் லக்சயா சென், இஸ்ரேலின் டேனில் டுபோவென்கோ மோதினர். அபாரமாக ஆடிய லக்சயா சென் 21-14, 21-13 என்ற நேர் செட் கணக்கில் வெற்றி பெற்று காலிறுதிக்குள் நுழைந்தார்.

மற்றொரு போட்டியில் இந்தியாவின் ஆயுஷ் ஷெட்டி 21-12, 21-19 என மலேசியாவின் ஜஸ்டின் ஹோவை தோற்கடித்தார். இந்தியாவின் கிரண் ஜார்ஜ் 21-19, 20-22, 11-21 என ஜப்பானின் ஷோகோ ஒகாவாவிடம் தோல்வியடைந்து வெளியேறினார்.

கலப்பு இரட்டையர் 2வது சுற்றில் இந்தியாவின் துருவ் கபிலா, தனிஷா கிராஸ்டோ ஜோடி வெற்றி பெற்றது. பெண்கள் இரட்டையர் 2வது சுற்றில் இந்தியாவின் திரிஷா, காயத்ரி கோபிசந்த் ஜோடி வெற்றி பெற்றது.