சீனாவில், 'சூப்பர் 750' அந்தஸ்து பெற்ற மாஸ்டர்ஸ் பாட்மின்டன் தொடர் நடக்கிறது. இதன் பெண்கள் ஒற்றையர் பிரிவு 2வது சுற்றில் இந்தியாவின் சிந்து, சிங்கப்பூரின் யோ ஜியா மின் மோதினர். முதல் செட்டை 16-21 என இழந்த சிந்து, பின் எழுச்சி கண்டு இரண்டாவது செட்டை 21-17 எனக் கைப்பற்றினார். வெற்றியாளரை நிர்ணயிக்கும் மூன்றாவது செட்டில் ஏமாற்றிய சிந்து 21-23 என போராடி கோட்டைவிட்டார். ஒரு மணி நேரம், 9 நிமிடம் நீடித்த போட்டியில் சிந்து 16-21, 21-17, 21-23 என்ற கணக்கில் தோல்வியடைந்தார்.

மற்றொரு போட்டியில் இந்தியாவின் அனுபமா 7-21, 14-21 என ஜப்பானின் நாட்சுகி நிடைராவிடம் தோல்வியடைந்தார். இந்தியாவின் மாளவிகா 9-21, 9-21 என தாய்லாந்தின் சுபனிதாவிடம் வீழ்ந்தார்.

காலிறுதியில் லக்சயா: ஆண்கள் ஒற்றையர் பிரிவு 2வது சுற்றில் இந்தியாவின் லக்சயா சென், டென்மார்க்கின் ராஸ்மஸ் ஜெம்கே மோதினர். அபாரமாக ஆடிய லக்சயா சென் 21-16, 21-18 என்ற நேர் செட் கணக்கில் வெற்றி பெற்று காலிறுதிக்கு முன்னேறினார்.

ஆண்கள் இரட்டையர் 2வது சுற்றில் இந்தியாவின் சாத்விக்சாய்ராஜ், சிராக் ஷெட்டி ஜோடி 21-19, 21-15 என டென்மார்க்கின் ராஸ்மஸ் கேஜர், பிரடெரிக் சோகார்ட் ஜோடியை வீழ்த்தி காலிறுதிக்குள் நுழைந்தது.

பெண்கள் இரட்டையரில் இந்தியாவின் திரீசா, காயத்ரி, கலப்பு இரட்டையரில் இந்தியாவின் சுமீத் ரெட்டி, சிக்கி ரெட்டி ஜோடி தோல்வியடைந்தன.