சர்வதேச கிரிக்கெட் கவுன்சில் (ஐ.சி.சி.,) சார்பில், ஒவ்வொரு ஆண்டும் சிறப்பாக விளையாடிய வீரர், வீராங்கனைகளுக்கு விருது வழங்கி கவுரவிக்கப்படும். கடந்த ஆண்டின் சிறந்த டெஸ்ட் வீரருக்கான விருதுக்கு இந்தியாவின் ஜஸ்பிரித் பும்ரா, இங்கிலாந்தின் ஜோ ரூட், ஹாரி புரூக், இலங்கையின் கமிந்து மெண்டிஸ் பரிந்துரைக்கப்பட்டனர்.

இதில் சிறந்த டெஸ்ட் வீரராக பும்ரா 31, தேர்வானார். கடந்த ஆண்டு 13 டெஸ்டில் விளையாடிய பும்ரா, 71 விக்கெட் கைப்பற்றினார். சமீபத்தில் ஆஸ்திரேலியாவில் நடந்த 'பார்டர்-கவாஸ்கர்' டிராபியில் 32 விக்கெட் வீழ்த்திய பும்ரா, தொடர் நாயகன் விருதை தட்டிச் சென்றார். டெஸ்ட் அரங்கில் ஒரு ஆண்டில் 70 அல்லது அதற்கு மேல் விக்கெட் கைப்பற்றிய 4வது இந்திய பவுலரானார். ஏற்கனவே கபில்தேவ், கும்ளே, அஷ்வின் இம்மைல்கல்லை எட்டியிருந்தனர். தவிர, டெஸ்ட் அரங்கில் 200 விக்கெட் சாய்த்த 12வது இந்திய பவுலரானார் பும்ரா. இதுவரை 45 டெஸ்டில், 205 விக்கெட் வீழ்த்தி உள்ளார். இவர், கடந்த ஆண்டின் சிறந்த டெஸ்ட் அணிக்கும் தேர்வு செய்யப்பட்டுள்ளார்.

சபாஷ் மந்தனா: கடந்த ஆண்டின் சிறந்த ஒருநாள் போட்டி வீராங்கனைக்கான விருதுக்கு இந்தியாவின் ஸ்மிருதி மந்தனா, ஆஸ்திரேலியாவின் அன்னாபெல் சதர்லேண்ட், தென் ஆப்ரிக்காவின் லாரா வோல்வார்ட், இலங்கையின் சமாரி பரிந்துரைக்கப்பட்டனர். இதில் சிறந்த வீராங்கனையாக மந்தனா தேர்வு செய்யப்பட்டார். கடந்த ஆண்டு ஒருநாள் போட்டியில் அதிக ரன் (747 ரன், 4 சதம், 3 அரைசதம், 13 போட்டி) குவித்த வீராங்கனையான மந்தனா, ஏற்கனவே 2018ல் இவ்விருது வென்றிருந்தார். கடந்த 2018, 2021ல் சிறந்த கிரிக்கெட் வீராங்கனைக்கான விருது வென்றிருந்த மந்தனா, சமீபத்தில் வெளியான கடந்த ஆண்டின் சிறந்த ஒருநாள், 'டி-20' அணிகளிலும் இடம் பெற்றிருந்தார்.

கடந்த ஆண்டின் சிறந்த ஒருநாள் போட்டி வீரருக்கான விருதுக்கு ஆப்கானிஸ்தான் 'ஆல்-ரவுண்டர்' அஸ்மதுல்லா ஓமர்சாய் தேர்வானார். கடந்த ஆண்டு 'ஆல்-ரவுண்டராக' அசத்திய இவர், 14 போட்டியில், 417 ரன், 17 விக்கெட் கைப்பற்றினார்.