இகோர் தியாகோ 'ஹாட்ரிக்'

லிவர்பூல்: இங்கிலிஷ் பிரிமியர் லீக் கால்பந்து போட்டியில் பிரன்ட்போர்டு அணி, எவர்டன் அணியை 4-2 என வீழ்த்தியது. பிரன்ட்போர்டு அணியின் முன்கள வீரர் இகோர் தியாகோ 'ஹாட்ரிக்' கோல் (11, 51, 88வது நிமிடம்) அடித்து அசத்தினார். இந்த சீசனில் 14 கோல் அடித்துள்ளார்.

காலிறுதியில் கேமரூன்

ரபாத்: மொரோக்காவில் ஆப்ரிக்க கோப்பை கால்பந்து தொடர் நடக்கிறது. 'ரவுண்ட்-16 போட்டியில்' ஐந்து முறை சாம்பியன் கேமரூன் அணி, தென் ஆப்ரிக்காவை 2-1 என வீழ்த்தி, காலிறுதிக்கு தகுதி பெற்றது. மற்றொரு போட்டியில் மொரோக்கோ அணி, டான்சானியாவை 1-0 என வீழ்த்தியது. மொரோக்கோவின் வெற்றிக்கு பிராஹிம் டியாஸ் (64வது நிமிடம்) ஒரு கோல் அடித்து உதவினார். காலிறுதியில் (ஜன.9) மொரோக்கோ-கேமரூன் அணிகள் மோத உள்ளன.

கோகோ காப் அதிர்ச்சி

பெர்த்: ஆஸ்திரேலியாவின் பெர்த்தில் யுனைடெட் கோப்பை டென்னிஸ் தொடர் நடக்கிறது. ஒற்றையர் 'ஏ' பிரிவு துவக்க போட்டியில், உலகின் 3ம் நிலை வீராங்கனையான அமெரிக்காவின் கோகோ காப், ஸ்பெயினின் ஜெசிக்கா பவுசாஸ் மனெய்ராவிடம் (42வது இடம்) 6-1, 6-7, 6-0 என அதிர்ச்சி தோல்வி அடைந்தார். ஸ்பெயின் 1-0 என முன்னிலை பெற்றது.

எக்ஸ்டிராஸ்

* ஆமதாபாத்தில் இன்று நடக்கவுள்ள விஜய் ஹசாரே டிராபி கிரிக்கெட் தொடருக்கான 'ஏ' பிரிவு லீக் போட்டியில் தமிழகம், திரிபுரா அணிகள் மோதுகின்றன. தமிழக அணி, இதுவரை விளையாடிய 5 போட்டியில், ஒன்றில் மட்டும் வெற்றி (4 தோல்வி) பெற்று, 4 புள்ளிகளுடன் 6வது இடத்தில் உள்ளது.

* இந்தியாவில் பெண்களுக்கான கால்பந்து லீக் (ஐ.டபிள்யு.எல்.,) தொடர் நடக்கிறது. 8 அணிகள் மோதுகின்றன. இன்று ஆறாவது சுற்று போட்டிகள் கோல்கட்டாவில் நடக்கின்றன. இதில் ஈஸ்ட் பெங்கால்-கிக்ஸ்டார்ட், சேது-நீடா, , ஸ்ரீபூமி-கார்வல், சேசா-கோகுலம் கேரளா அணிகள் மோதுகின்றன.

* உலக டேக்வாண்டோ தரவரிசை பட்டியல் வெளியானது. இந்திய வீராங்கனை ரூபா பேயர், ஆசிய அளவில் 'நம்பர்-1', உலக அளவில் 6வது இடம் பிடித்தார். இவர் பூம்சே பிரிவில் 100.85 புள்ளி பெற்றுள்ளார். உலக டேக்வாண்டோ தரவரிசையில் சிறந்த இடம் பெற்ற முதல் இந்தியர் என பெருமை பெற்றார்.

* கேலோ இந்தியா பீச் விளையாட்டு, நேற்று டையு நகரில் துவங்கியது. இந்தியா முழுவதும் 1100க்கும் மேற்பட்ட நட்சத்திரங்கள் பங்கேற்கின்றனர். வாலிபால், கபடி, செபக் தக்ரா உட்பட பல்வேறு விளையாட்டுகள் நடக்க உள்ளன.