இந்தியா, இலங்கையில், அடுத்த ஆண்டு ஐ.சி.சி., 'டி-20' உலக கோப்பை 10வது சீசன் நடக்கவுள்ளது. மொத்தம் 20 அணிகள் பங்கேற்கின்றன. இந்தியா, இலங்கை, ஆஸ்திரேலியா, இங்கிலாந்து உள்ளிட்ட 12 அணிகள் நேரடியாக தகுதி பெற்றன. மீதமுள்ள இடங்களுக்கு தகுதிச் சுற்று நடத்தப்படுகிறது.

ஜிம்பாப்வேயில் நடந்த ஆப்ரிக்க மண்டல அணிகளுக்கான தகுதிச் சுற்றில் 8 அணிகள் பங்கேற்றன. இவை இரு பிரிவுகளாக பிரிக்கப்பட்டு, போட்டிகள் லீக் முறையில் நடந்தன. ஒவ்வொரு பிரிவிலும் முதல் இரு இடம் பெற்ற அணிகள் அரையிறுதிக்கு முன்னேறின.

முதல் அரையிறுதியில் நமீபிய அணி (174/6), தான்சானியாவை (111/8) 63 ரன்னில் வென்றது. மற்றொரு அரையிறுதியில் முதலில் களமிறங்கிய கென்யா, 122/6 ரன் (20 ஓவர்) எடுத்தது. ஜிம்பாப்வே அணி 15 ஓவரில் 123/3 ரன் எடுத்து 7 விக்கெட்டில் வென்றது.

இதையடுத்து பைனலுக்கு (இன்று) முன்னேறிய ஜிம்பாப்வே, நமீபிய அணிகள், 2026 'டி-20' உலக கோப்பை தொடருக்கு தகுதி பெற்றன.

இதுவரை எத்தனை

இதுவரை நேரடியாக 12, தகுதிச்சுற்றில் இருந்து கனடா (அமெரிக்கா), இத்தாலி, நெதர்லாந்து (ஐரோப்பா), ஜிம்பாப்வே, நமீபியா (ஆப்ரிக்கா) என 17 அணிகள் தகுதி பெற்றுள்ளன. ஆசிய-பசிபிக் மண்டல தகுதிச்சுற்று அக்., 8-17ல் ஓமனில் நடக்க உள்ளன. இதில் 'டாப்-3' இடம் பெறும் அணிகள் பிரதான தொடருக்கு முன்னேறலாம்.