சர்வதேச 'டி-20' போட்டியில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது. இதில் 'ஆல்-ரவுண்டர்' தரவரிசையில் இந்தியாவின் ஹர்திக் பாண்ட்யா, 244 புள்ளிகளுடன் 3வது இடத்தில் இருந்து மீண்டும் 'நம்பர்-1' இடத்துக்கு முன்னேறினார். இதற்கு முன், இந்த ஆண்டு நடந்த 'டி-20' உலக கோப்பை தொடருக்கு பின் வெளியான தரவரிசையில் முதன்முறையாக 'நம்பர்-1' இடம் பிடித்திருந்தார்.

பேட்டர்களுக்கான தரவரிசையில் இந்தியாவின் திலக் வர்மா, 806 புள்ளிகளுடன் 72வது இடத்தில் இருந்து 'நம்பர்-3' இடத்துக்கு முன்னேறினார். தென் ஆப்ரிக்காவுக்கு எதிரான 'டி-20' தொடரில் 2 சதம் உட்பட 280 ரன் குவித்த இவர், தொடர் நாயகன் விருதை தட்டிச் சென்றார். முதலிரண்டு இடங்களில் ஆஸ்திரேலியாவின் டிராவிஸ் ஹெட் (855), இங்கிலாந்தின் பில் சால்ட் (828) உள்ளனர்.

இந்திய கேப்டன் சூர்யகுமார் யாதவ் (788), 3வது இடத்தில் இருந்து 4வது இடத்துக்கு தள்ளப்பட்டார்.

பவுலர்களுக்கான தரவரிசையில் இந்திய வேகப்பந்துவீச்சாளர் அர்ஷ்தீப் சிங் (656), 12வது இடத்தில் இருந்து 9வது இடத்துக்கு முன்னேறினார். தென் ஆப்ரிக்க தொடரில் இவர் 8 விக்கெட் சாய்த்திருந்தார். இத்தொடரில் 12 விக்கெட் கைப்பற்றிய இந்தியாவின் வருண் சக்கரவர்த்தி (566), 28வது இடத்துக்கு முன்னேறினார். மற்றொரு இந்திய வீரர் ரவி பிஷ்னோய் (666), 8வது இடத்துக்கு தள்ளப்பட்டார். முதலிடத்தில் இங்கிலாந்தின் அடில் ரஷித் (701) நீடிக்கிறார்.