கோல்கட்டா ஈடன் கார்டன் மைதானத்தில் நேற்று நடந்த பிரிமியர் லீக் போட்டியில் (பகலிரவு) கோல்கட்டா, லக்னோ அணிகள் மோதின. 'டாஸ்' வென்ற கோல்கட்டா கேப்டன் ரகானே, 'பவுலிங்' தேர்வு செய்தார்.

சபாஷ் மார்ஷ்

லக்னோ அணிக்கு 'டாப்-ஆர்டர்' பேட்டர்கள் மிரட்டினர். மிட்சல் மார்ஷ், மார்க்ரம் கலக்கல் துவக்கம் தந்தனர். இருவரும் பவுண்டரி, சிக்சர்களாக பறக்கவிட ஸ்கோர் மின்னல் வேகத்தில் உயர்ந்தது. முதல் விக்கெட்டுக்கு 10.1 ஓவரில் 99 ரன் சேர்த்த நிலையில், ஹர்ஷித் ராணா பந்தில் மார்க்ரம் (47, 4x4, 2x6) அவுட்டானார். இத்தொடரில் நான்காவது அரைசதம் கடந்த மார்ஷ், 81 ரன்னுக்கு (6x4, 5x6) அவுட்டானார்.

பூரன் வாணவேடிக்கை

பின் கோல்கட்டா பவுலர்களை புரட்டி எடுத்த பூரன். 21 பந்தில் அரைசதம் எட்டினார். ரசல் ஓவரில் (18வது), பூரன் 24 (4,4,6,4,6) ரன் விளாசினார். அப்துல் (6) நிலைக்கவில்லை. கடைசி 10 ஓவரில் 143 ரன் எடுக்கப்பட்டன. லக்னோ அணி 20 ஓவரில் 238/3 ரன் குவித்தது. பூரன் (87, 7x4, 8x6), மில்லர் (4) அவுட்டாகாமல் இருந்தனர்.

ரகானே அரைசதம்

கடின இலக்கை விரட்டிய கோல்கட்டா அணிக்கு குயின்டன் (15) ஏமாற்றினார். கேப்டன் ரகானே, சுனில் நரைன் விரைவாக ரன் சேர்த்தனர். நரைன், 30 ரன்னுக்கு வெளியேறினார். 26 பந்தில் அரைசதம் எட்டினார் ரகானே. இந்த சமயத்தில் ஷர்துல் தாகூர் பந்தில் ரகானே (61, 8X4, 2X6) அவுட்டாக, சிக்கல் ஏற்பட்டது. ரமன்தீப் சிங் (1), ரகுவன்ஷி (5) சோபிக்கவில்லை. வெங்கடேஷ், 45 ரன்னுக்கு வெ ளியேறினார். ரசல் (7) விரைவில் நடையை கட்டினார். 18 ஓவரில் கோல்கட்டா 201/7 ரன் எட்டியது.

ரிங்கு சிங் ஆறுதல்

கடைசி 12 பந்தில் வெற்றிக்கு 38 ரன் தேவைப்பட்டது. அவேஷ் கான் ஓவரில் (19), ரிங்கு சிங் 14 ரன் (6,4,4) விளாச, 'டென்ஷன்' அதிகரித்தது. கடைசி ஓவரில் 24 ரன் தேவை என்ற நிலையில், பிஷ்னோய் பந்துவீசினார். முதல் பந்தில் பவுண்டரி அடித்த ஹர்ஷித் ராணா, அடுத்த இரு பந்தில் ஒரு ரன் எடுக்க வாய்ப்பு மங்கியது. கடைசி 3 பந்தில் 19 ரன் தேவைப்பட்டன. 3 சிக்சர் அடித்தால் 'சூப்பர் ஓவருக்கு' வாய்ப்பு இருந்தது. ரிங்கு சிங் (4, 4, 6) விளாசியும் பலன் கிடைக்கவில்லை. கோல்கட்டா அணி 20 ஓவரில் 234/7 ரன் மட்டும் எடுத்து, தோற்றது. ரிங்கு சிங் (38), ஹர்ஷித் (10) அவுட்டாகாமல் இருந்தனர்.

ஆட்டநாயகன் விருதை பூரன் வென்றார்.

ஷர்துல் '100'

லக்னோ அணியின் ஷர்துல் தாகூர் நேற்று தனது 100வது பிரிமியர் போட்டியில் பங்கேற்றார். இவருக்கு '100' என்ற நம்பர் பொறிக்கப்பட்ட சிறப்பு 'ஜெர்சி'யை லக்னோ ஆலோசகர் ஜாகிர் கான் வழங்கினார்.

* நேற்று தடுமாறிய ஷர்துல், பிரிமியர் அரங்கில் தொடர்ந்து 5 'வைடு' (12.1வது ஓவர்) வீசிய முதல் வீரரானார்.

2வது அதிகம்

பிரிமியர் அரங்கில் லக்னோ அணி அதிபட்சமாக 257/7 ரன் (எதிர், பஞ்சாப், 2023, மொகாலி) எடுத்து உள்ளது. நேற்று இரண்டாவது அதிகபட்ச ஸ்கோரை (238/3) பதிவு செய்தது.

அதிவேக 2000 ரன்

பிரிமியர் அரங்கில் அதிவேகமாக 2,000 ரன் எட்டிய இரண்டாவது வீரரானார் பூரன் (1198 பந்து). முதலிடத்தில் ரசல் (1120 பந்து) உள்ளார்.

ரகானே 7000 ரன்

நேற்று 61 ரன் எடுத்த கோல்கட்டா கேப்டன் ரகானே, 'டி-20' அரங்கில் 50வது அரைசதம் அடித்தார். 'டி-20' அரங்கில் 7,000 ரன் (276 போட்டி) எட்டி அசத்தினார்.

குறைந்த வித்தியாசம்

பிரிமியர் அரங்கில், ரன் அடிப்படையில் 3வது குறைவான வித்தியாசத்தில் (4 ரன்) லக்னோ வென்றது. இதற்கு முன் 1 ரன் (எதிர், கோல்கட்டா, 2023), 2 ரன் (எதிர், கோல்கட்டா, 2022) வென்றிருந்தது.

* பிரிமியர் அரங்கில் 'சேஸ்' செய்த போட்டிகளில் 4 அல்லது அதற்கு குறைவான ரன் வித்தியாசத்தில் 7 முறை கோல்கட்டா தோற்றது. இதில் 3 முறை லக்னோவிடம் தோல்வியை சந்தித்தது.