டில்லியை சேர்ந்தவர் மயங்க் யாதவ், 22. பிரிமியர் ஏலத்தில் (2022) இவரை லக்னோ அணி ரூ. 20 லட்சத்திற்கு வாங்கியது. கடந்த சீசனில் 156.7 கி.மீ., வேகத்தில் பந்து வீசினார். தவிர தொடர்ந்து 150 கி.மீ., வேகத்தில் பந்துவீசும் திறன் கொண்டவர். 18 ஆண்டு ஐ.பி.எல்., வரலாற்றில் அறிமுகம் ஆன முதல் இரு போட்டியில் ஆட்டநாயகன் ஆன முதல் வீரர் என வரலாறு படைத்தார். கடந்த சீசனில் 4 போட்டியில் மட்டும் பங்கேற்ற நிலையில், வயிற்றுப் பிடிப்பு காரணமாக விலகினார்.

வங்கதேசத்திற்கு எதிரான 'டி-20' தொடரில் கடந்த 2024, அக்., மாதம் அறிமுகம் ஆனார். பின் உள்ளூர் போட்டிகளில் பங்கேற்காத மயங்க், பெங்களூரு தேசிய கிரிக்கெட் அகாடமியில், மீண்டு வர தேவையான பயிற்சியில் ஈடுபட்டார். இருப்பினும், லக்னோ அணி, இவரை தக்கவைத்துக் கொண்டது.

நடப்பு பிரிமியர் சீசனில் களமிறங்க இருந்தார். ஆனால் எதிர்பாராத விதமாக கால் விரலில் காயம் ஏற்பட்டது. இதில் இருந்து மீண்ட மயங்க், மீண்டும் லக்னோ அணியில் இணைந்தார். வரும் 19ல் ஜெய்ப்பூரில் நடக்கவுள்ள ராஜஸ்தான் அணிக்கு எதிரான போட்டியில் களமிறங்க காத்திருக்கிறார். இவரது வருகை, லக்னோ அணியின் பவுலிங்கை பலப்படுத்தியுள்ளது.