கார்த்திக் சர்மா கூறுகையில், ''ஆடுகளம் பேட்டிங் செய்ய சாதகமாக இருந்தது. இப்போட்டியில் அரைசதம் விளாசினால், துப்பாக்கி சுடுவது போல மகிழ்ச்சியை கொண்டாட திட்டமிட்டிருந்தேன். அடுத்து வரும் போட்டிகளில் சிறப்பாக செயல்பட முயற்சிப்பேன்,'' என்றார்.

பிளமிங் பாராட்டு

சென்னை: சேப்பாக்கத்தில் நடந்த லீக் போட்டியில் சென்னை அணி, மும்பையை வீழ்த்தியது. சென்னை அணிக்கு கேப்டன் ருதுராஜ் கெய்க்வாட் (67*), கார்த்திக் சர்மா (54*) கைகொடுத்தனர்.

சென்னை அணியின் தலைமை பயிற்சியாளர் ஸ்டீபன் பிளமிங் கூறுகையில், ''முதல் 7 போட்டிகளில் ருதுராஜ் தடுமாறினார். இதனால் இவரது கேப்டன் பதவி குறித்து விமர்சனம் எழுந்தன. கடந்த இரு போட்டியில் (74, 67*), இவரது பேட்டிங்கில் நல்ல முன்னேற்றத்தை காண முடிந்தது. இந்த 'பார்ம்', இவரை சிறந்த கேப்டனாக செயல்பட உதவுகிறது.

கார்த்திக் சர்மா திறமையானவர் என்பதால் தான் ஏலத்தில் அதிக விலைக்கு ஒப்பந்தமானார். நாளுக்கு நாள் அவரது பேட்டிங்கில் நல்ல முன்னேற்றம் தெரிகிறது. மும்பைக்கு எதிராக இவர் விளையாடியதை நினைத்து பெருமை கொள்கிறோம். இவருக்கு 4வது இடம் பொருத்தமாக உள்ளது,'' என்றார்.