தோனி: உலக சாம்பியன் பட்டம் வென்ற இந்திய அணியினருக்கு வாழ்த்துகள். எனது இதயதுடிப்பு அதிகரித்தது. இக்கட்டான சூழ்நிலையில் அமைதியாக இருந்து தன்னம்பிக்கையுடன் போராடி வெற்றி பெற்றது சிறப்பு. எனது பிறந்த நாள் பரிசாக, விலைமதிப்பற்ற பரிசு வழங்கியதற்கு நன்றி.

சச்சின்: வாழ்க்கை ஒரு வட்டம். 2007ல் வெஸ்ட் இண்டீஸ் மண்ணில் இழந்த உலக கோப்பையை, 2024ல் வெஸ்ட் இண்டீசில் பெற்றிருப்பது சிறப்பு. இந்த வெற்றியின் எனது நண்பர் டிராவிட் பங்களிப்பு மகத்தானது. ஒட்டுமொத்த அணியினருக்கும் வாழ்த்துகள்.

கவாஸ்கர்: நீண்ட நாட்களுக்கு பின் இந்தியாவுக்கு கிடைத்துள்ள மிகப் பெரிய வெற்றி. உலக கோப்பை வென்றது போட்டியில் சதம் விளாசுவதற்கு சமமானது. இதற்கு முன் நடந்த உலக கோப்பையில் அரையிறுதி, பைனல் வரை சென்ற இந்தியா, சதமடிக்க தவறியது. தற்போது சதம் விளாசியதால் கோப்பை வென்றது.

கங்குலி: ரோகித் சர்மா தலைமையிலான இந்திய அணியினருக்கு மனமார்ந்த வாழ்த்துகள். இன்னும் நிறைய கோப்பை வெல்வர். டிராவிட் தலைமையிலான பயிற்சியாளர் குழு, பும்ரா, கோலி, பாண்ட்யா உள்ளிட்ட அனைவரும் சிறப்பாக செயல்பட்டு நாட்டிற்கு பெருமை சேர்த்தனர்.

லட்சுமண், கும்ளே, காம்பிர் உள்ளிட்ட முன்னாள் வீரர்கள் இந்திய அணியினருக்கு தங்களது வாழ்த்துகளை தெரிவித்தனர்.

கபில், தோனி வரிசையில்...

இந்தியாவுக்கு உலக கோப்பை பெற்றுத்தந்த கேப்டன்கள் வரிசையில் கபில்தேவ், தோனியுடன் இணைந்தார் ரோகித். 1983ல் கபில்தேவ் தலைமையிலான இந்திய அணி முதன்முறையாக உலக சாம்பியன் (50 ஓவர்) ஆனது. பின், 2007 ('டி-20'), 2011ல் (50 ஓவர்) தோனி வழிநடத்திய இந்திய அணி சாம்பியன் பட்டத்தை தட்டிச் சென்றது. தற்போது 13 ஆண்டுகளுக்கு பின், ரோகித் சர்மா தலைமையிலான இந்திய அணி 'டி-20' உலக கோப்பை வென்றது.

பத்து பட்டம்

ஐ.சி.சி., நடத்தும் உலக கோப்பை போன்ற மிகப் பெரிய தொடர்களில் அதிக முறை கோப்பை வென்ற அணிகளுக்கான வரிசையில் ஆஸ்திரேலியா முதலிடத்தில் உள்ளது. இதுவரை, 50 ஓவர் உலக கோப்பை 6 (1987, 1999, 2003, 2007, 2015, 2023), சாம்பியன்ஸ் டிராபி 2 (2006, 2009), 'டி-20' உலக கோப்பை (2021), உலக டெஸ்ட் சாம்பியன்ஷிப் (2023) தலா ஒரு முறை என 10 பட்டம் வென்றுள்ளது. அடுத்த இடத்தில் இந்தியா உள்ளது. இந்திய அணி 50 ஓவர் உலக கோப்பை 2 (1983, 2011), சாம்பியன்ஸ் டிராபி 2 (2002, 2013), 'டி-20' உலக கோப்பை 2 (2007, 2024) என 6 முறை சாம்பியன் ஆனது.