ஜிம்பாப்வே சென்றுள்ள நியூசிலாந்து அணி, இரண்டு போட்டிகள் கொண்ட டெஸ்ட் தொடரில் பங்கேற்கிறது. முதல் போட்டி புலவாயோவில் நடந்தது. முதல் இன்னிங்சில் ஜிம்பாப்வே 149, நியூசிலாந்து 307 ரன் எடுத்தன. இரண்டாம் நாள் முடிவில் ஜிம்பாப்வே அணி 2வது இன்னிங்சில் 31/2 ரன் எடுத்திருந்தது.

மூன்றாம் நாள் ஆட்டத்தில் ஜிம்பாப்வே அணிக்கு சீன் வில்லியம்ஸ் (49), கேப்டன் கிரெய்க் எர்வின் (22), டிசிகா (29) ஓரளவு கைகொடுத்தனர். ஜிம்பாப்வே அணி 2வது இன்னிங்சில் 165 ரன்னுக்கு 'ஆல்-அவுட்' ஆனது. நியூசிலாந்து சார்பில் மாட் ஹென்றி, ஓ'ரூர்கே தலா 3 விக்கெட் சாய்த்தனர்.

பின், 8 ரன் எடுத்தால் வெற்றி என்ற சுலப இலக்குடன் களமிறங்கிய நியூசிலாந்து அணிக்கு கான்வே (4) ஏமாற்றினார். நியூமன் நியாம்ஹுரி பந்தை பவுண்டரிக்கு விரட்டிய ஹென்றி நிக்கோல்ஸ் (4*) வெற்றியை உறுதி செய்தார். நியூசிலாந்து அணி 2வது இன்னிங்சில் 8/1 ரன் எடுத்து வெற்றி பெற்றது. ஆட்ட நாயகன் விருதை மாட் ஹென்றி வென்றார்.

இரண்டாவது டெஸ்ட், ஆக. 7ல் புலவாயோவில் துவங்குகிறது.