இந்திய வேகப்பந்துவீச்சாளர் முகமது ஷமி 34. இதுவரை 64 டெஸ்ட் (229 விக்கெட்), 101 ஒருநாள் (195), 23 சர்வதேச 'டி--20' (24) போட்டியில் பங்கேற்றுள்ளார். கடைசியாக கடந்த ஆண்டு (நவ. 19) ஆமதாபாத்தில் நடந்த ஆஸ்திரேலியாவுக்கு எதிரான உலக கோப்பை (50 ஓவர்) பைனலில் விளையாடினார். கணுக்கால் காயத்தால் பாதிக்கப்பட்ட இவர், கடந்த பிப்ரவரி மாதம் 'ஆப்பரேஷன்' செய்து கொண்டார். பெங்களூருவில் உள்ள தேசிய கிரிக்கெட் அகாடமியில் (என்.சி.ஏ.,) காயத்தில் இருந்து மீள மறுவாழ்வு பயிற்சி மேற்கொண்டு வரும் ஷமி, பவுலிங் வலைப்பயிற்சி மேற்கொண்டார்.

இந்திய அணிக்கு திரும்புவதற்காக, ரஞ்சி கோப்பை தொடரில் பெங்கால் அணிக்காக விளையாட உள்ளார் ஷமி. ரஞ்சி கோப்பையில் பெங்கால் அணி, தனது முதலிரண்டு போட்டியில் உ.பி., (அக். 11-14), பீஹார் (அக். 18-21) அணிகளை சந்திக்கிறது. இவ்விரு போட்டி அல்லது ஏதாவது ஒரு போட்டியில் ஷமி விளையாடலாம்.

இந்தியா வரவுள்ள நியூசிலாந்து அணி 3 போட்டிகள் கொண்ட டெஸ்ட் தொடரில் பங்கேற்கிறது. முதல் டெஸ்ட் பெங்களூருவின் அக். 19ல் துவங்குகிறது. மீதமுள்ள போட்டிகள் புனே (அக். 24-28), மும்பையில் (நவ. 1-5) நடக்கவுள்ளன. ரஞ்சி கோப்பையில் ஷமி தனது உடற்தகுதி, திறமையை நிரூபிக்கும் பட்சத்தில் நியூசிலாந்துக்கு தொடருக்கு தேர்வாகலாம்.