வங்கதேசம் சென்ற தென் ஆப்ரிக்க அணி, இரண்டு போட்டிகள் கொண்ட டெஸ்ட் தொடரில் பங்கேற்றது. முதல் டெஸ்டில் தென் ஆப்ரிக்கா வென்றது. இரண்டாவது டெஸ்ட் சாட்டோகிராமில் நடந்தது. தென் ஆப்ரிக்க அணி முதல் இன்னிங்சில் 575/6 ('டிக்ளேர்') ரன் எடுத்தது. இரண்டாம் நாள் முடிவில் வங்கதேச அணி முதல் இன்னிங்சில் 38/4 ரன் எடுத்திருந்தது.

மூன்றாம் நாள் ஆட்டத்தில் மோமினுல் ஹக் (82) அரைசதம் கடந்தார். கேப்டன் நஜ்முல் ஹொசைன் ஷான்டோ (9), முஷ்பிகுர் ரஹிம் (0) உள்ளிட்ட மற்றவர்கள் ஏமாற்றினர். வங்கதேச அணி முதல் இன்னிங்சில் 159 ரன்னுக்கு சுருண்டு, 'பாலோ-ஆன்' பெற்றது. தென் ஆப்ரிக்கா சார்பில் ரபாடா 5 விக்கெட் சாய்த்தார்.

பின் 2வது இன்னிங்சை துவக்கிய வங்கதேச அணி, தென் ஆப்ரிக்க 'சுழலில்' சரிந்தது. கேப்டன் ஷான்டோ (36), ஹசன் மஹ்முத் (38*) ஆறுதல் தந்தனர். வங்கதேச அணி 2வது இன்னிங்சில் 143 ரன்னுக்கு சுருண்டு தோல்வியடைந்தது. தென் ஆப்ரிக்கா சார்பில் கேஷவ் மஹாராஜ் 5, முத்துசாமி 4 விக்கெட் சாய்த்தனர்.

ஆட்ட நாயகன் விருதை தென் ஆப்ரிக்காவின் டோனி டி ஜோர்ஜி (177 ரன்) வென்றார். தொடர் நாயகன் விருதை தென் ஆப்ரிக்காவின் ரபாடா (14 விக்கெட்) கைப்பற்றினார்.