இந்திய அணி 'சீனியர்' கோலி 35. கடந்த 2022ல் 'டி-20' உலக கோப்பை அரையிறுதியில் இந்தியா தோற்றதும் ஓய்வு பெறுவார் என நம்பப்பட்டது. மீண்டும் வந்த கோலி, கடைசியாக இத்தொடரில் பங்கேற்றார். பைனலில் அரைசதம் விளாச, 2007க்கும் பின் இந்தியா 'டி-20' உலக கோப்பை வென்றது. இம்மகிழ்ச்சியில் சர்வதேச 'டி-20' போட்டிகளில் இருந்து ஓய்வு பெற்றார் கோலி.

பைனலில் ஆட்டநாயகன் ஆன இவர் கூறியது:

எனது கடைசி 'டி-20' உலக கோப்பை தொடர் இது. தவிர இந்தியாவுக்காக விளையாடும், எனது கடைசி 'டி-20' போட்டி. இதில் எப்படியும் வென்று, சாம்பியன் ஆக வேண்டும் என விரும்பினோம்.

ஏனெனில் ஐ.சி.சி., தொடரில் கோப்பை வெல்ல நாங்கள் நீண்ட காலமாக காத்திருந்தோம். ரோகித் 9 முறை, நான் 6 முறை 'டி-20' உலக கோப்பை தொடரில் விளையாடி உள்ளோம். அடுத்த தலைமுறை வீரர்கள், 'டி-20' போட்டியை முன்னெடுத்துச் செல்ல இது தான் சரியான நேரம். இந்தியா சாம்பியன் ஆன இந்த நாள் மறக்க முடியாத தருணமாக அமைந்துள்ளது.

இவ்வாறு அவர் கூறினார்.

4,188

சர்வதேச 'டி-20' அரங்கில் கோலி, இந்திய அணிக்காக 125 போட்டியில் 4,188 ரன் (1 சதம், 38 அரைசதம்) எடுத்தார்.