ஐரோப்பிய அணிகளுக்கு இடையிலான யூரோ கோப்பை கால்பந்து தொடர் ஜெர்மனியில் நடக்கிறது. நேற்று நடந்த 'எப்' பிரிவு போட்டியில் 'பிபா' தரவரிசையில் 6 வது இடத்திலுள்ள கிறிஸ்டியானோ ரொனால்டோவின் போர்ச்சுகல், 36வது இடத்திலுள்ள செக் குடியரசு அணிகள் மோதின.

போட்டி துவங்கிய 11வது நிமிடத்தில் சக வீரர் ரபேல் லியாவோ கொடுத்த பந்தை, தலையால் முட்டி கோலாக்க முயன்றார் ரொனால்டோ. பந்து வெளியே செல்ல வாய்ப்பு நழுவியது. 32வது நிமிடத்தில் ரொனால்டோ அடித்த பந்தை, செக் குடியரசு கோல் கீப்பர் ஜின்ரிச் ஸ்டானெக் தடுத்தார். 39 வது நிமிடம் முரட்டு ஆட்டம் ஆடிய போர்ச்சுகல் வீரர் ரபேல் லியாவோ, 'எல்லோ கார்டு' பெற்றார். முதல் பாதியில் இரு அணிகளும் கோல் எதுவும் அடிக்கவில்லை.

இரண்டாவது பாதியில் 55வது நிமிடம், 'பிரீ கிக்' வாய்ப்பில் ரொனால்டோ அடித்த பந்தை, கோல் கீப்பர் ஜின்ரிச் தடுத்தார். போட்டியின் 62வது நிமிடம் விளாடிமிர் கவுபால் கொடுத்த பந்தை பெற்ற லுகாஸ் புரோவோத், வலது காலால் உதைத்து கோலாக மாற்றினார். செக் குடியரசு அணி 1-0 என முன்னிலை பெற்றது.

'சேம் சைடு' கோல்

69 வது நிமிடம் கோல் கீப்பர் ஜின்ரிச் பந்தை தடுக்க, இதை வெளியே தள்ள முயன்றார் செக் குடியரசின் ராபின் ஹரனாக். துரதிருஷ்டவசமாக பந்து வலைக்குள் செல்ல, 'சேம் சைடு' கோல் ஆனது (ஸ்கோர் 1-1). 78 வது நிமிடம் ரொனால்டோ கொடுத்த பந்தை வாங்கிய விடினா, கோல் போஸ்ட் நோக்கி அடித்தார். இதை அங்கிருந்த செக் குடியரசு கோல் கீப்பர் ஜின்ரிச் ஸ்டானெக் தடுத்தார். 87 வது நிமிடம் போர்ச்சுகலின் தியாகோ கோல் அடித்தார். 'வார்' தொழில்நுட்பத்தில் இது 'ஆப்சைடு' எனத் தெரியவர கோல் அனுமதிக்கப்படவில்லை.

இரண்டாவது பாதியின் ஸ்டாப்பேஜ் நேரத்தில் (90+2வது நிமிடம்), மாற்று வீரராக விளையாடிய போர்ச்சுகலின் பிரான்சிஸ்கோ கன்செய்காவோ, இடது காலால் பந்தை உதைத்து கோல் அடித்து கைகொடுத்தார். முடிவில் போர்ச்சுகல் அணி 2-1 என்ற கணக்கில் 'திரில்' வெற்றி பெற்றது.

6

யூரோ கோப்பை வரலாற்றில் 6வது முறையாக களமிறங்கிய முதல் வீரர் ஆனார் ரொனால்டோ. இதுவரை 25 போட்டியில் 14 கோல் அடித்துள்ளார். குரோஷியாவின் லுகா மாட்ரிச், 5 வது முறையாக பங்கேற்கிறார்.

அப்பாவும், மகனும்

கடந்த 2000ல் நடந்த யூரோ தொடரில் போர்ச்சுகல் அணிக்காக செர்ஜியோ கோல் அடித்தார். இவரது மகன் பிரான்சிஸ்கோ நேற்று அசத்தினார். இதையடுத்து, இத்தொடரில் கோல் அடித்த இரண்டாவது 'அப்பா-மகன்' என்ற பெருமை இவர்களுக்கு கிடைத்தது. முன்னதாக இத்தாலியின் என்ரிகோ சியசா (1996), பெடெரிகோ சியசா (2020) இதுபோல கோல் அடித்து இருந்தனர்.

மூத்த வீரர்

யூரோ கோப்பை தொடரில் பங்கேற்கும் மூத்த வீரர் ஆனார் போர்ச்சுகலின் பெபே (41 வயது, 113 நாள்). முன்னதாக ஹங்கேரி கோல் கீப்பர் கபார் கிராலே (40 வயது, 86 நாள்) இருந்தார்.