இந்தியாவில் பெண்களுக்கான கால்பந்து லீக் (ஐ.டபிள்யு.எல்.,) தொடர், கோல்கட்டாவில் நடக்கிறது. ஈஸ்ட் பெங்கால், தமிழகத்தின் சேது (மதுரை), கோகுலம் கேரளா உட்பட மொத்தம் 8 கிளப் அணிகள் பங்கேற்கின்றன. இதன் ஐந்தாவது சுற்று போட்டிகள் நேற்று நடந்தன.

மேற்கு வங்கத்தின் கல்யாணி மைதானத்தில் நடந்த போட்டியில், ஈஸ்ட் பெங்கால், ஒடிசாவின் நீடா அணிகள் மோதின. சுலஞ்சனா (6 வது நிமிடம்), சவுமியா (42), ரெஸ்டி (51), பஜிலா (63), பிரியங்கா (89) தலா ஒரு கோல் அடிக்க, ஈஸ்ட் பெங்கால் அணி 5-0 என்ற கணக்கில் வெற்றி பெற்றது.

கோல்கட்டாவில் நடந்த போட்டியில் தமிழகத்தின் சேது, கோவாவின் சேசா அணிகள் மோதின. இதில் சேது அணி 5-0 என்ற கோல் கணக்கில் வெற்றி பெற்றது. மார்டினா தேவி (24), காவியா (27), பாபினா தேவி (35), லிண்டா (65), ருச்சி (72) தலா ஒரு கோல் அடித்து கைகொடுத்தனர்.

மற்றொரு போட்டியில் கர்நாடகாவின் கிக்ஸ்டார்ட் அணி 2-1 என கோல்கட்டாவின் ஸ்ரீபூமி அணியை வென்றது. கோகுலம் கேரளா, டில்லியின் கார்வல் யுனைடெட் அணிகள் மோதிய போட்டி 1-1 என 'டிரா' ஆனது.