இந்தியன் சூப்பர் லீக் (ஐ.எஸ்.எல்.,) கால்பந்து 10வது சீசன் நாட்டின் முக்கிய நகரங்களில் நடக்கிறது. அசாமின் கவுகாத்தியில் நடந்த லீக் போட்டியில் வடகிழக்கு யுனைடெட், ஈஸ்ட் பெங்கால் அணிகள் மோதின. துவக்கத்தில் இருந்து ஆதிக்கம் செலுத்திய வடகிழக்கு அணிக்கு டோமி ஜூரிக் (4வது நிமிடம்), நெஸ்டர் அல்பியாச் (15வது) தலா ஒரு கோல் அடித்தனர். முதல் பாதி முடிவில் வடகிழக்கு அணி 2-0 என முன்னிலையில் இருந்தது.

இரண்டாவது பாதியில் எழுச்சி கண்ட ஈஸ்ட் பெங்கால் அணிக்கு 53வது நிமிடத்தில் நந்தகுமார் சேகர் ஒரு கோல் அடித்தார். இதற்கு 66வது நிமிடத்தில் வடகிழக்கு அணியின் ஜூரிக் மீண்டும் ஒரு கோல் அடித்தார். தொடர்ந்து போராடிய ஈஸ்ட் பெங்கால் அணிக்கு பிரவுன் போர்ப்ஸ் (82வது நிமிடம்) ஆறுதல் தந்தார்.

ஆட்டநேர முடிவில் வடகிழக்கு யுனைடெட் அணி 3-2 என்ற கணக்கில் வெற்றி பெற்றது. இதுவரை விளையாடிய 14 போட்டியில், 3 வெற்றி, 7 'டிரா', 4 தோல்வி என 16 புள்ளிகளுடன் வடகிழக்கு அணி 6வது இடத்துக்கு முன்னேறியது.