உ.பி.,யில் தேசிய குத்துச்சண்டை சாம்பியன்ஷிப் நடக்கிறது. முதன் முறையாக ஆண்கள், பெண்களுக்கான தொடர் ஒரே நேரத்தில் நடத்தப்படுகிறது. 10 பிரிவுகளில் இந்தியா முழுவதும் இருந்து 600 வீரர், வீராங்கனைகள் பங்கேற்றுள்ளனர்.

நேற்று காலிறுதி போட்டிகள் நடந்தன. 48-51 கிலோ பிரிவில் உலக சாம்பியன்ஷிப்பில் இரு முறை பதக்கம் வென்ற நிஹாத் ஜரீன், காலிறுதியில் மணிப்பூரின் சானுவை எதிர்கொண்டார். இதில் 5:0 என வென்ற நிஹாத், அரையிறுதிக்கு முன்னேறினார்.

உலக சாம்பியன் மீனாட்ஷி ஹூடா (45-48 கிலோ), பஞ்சாப்பின் காஷிஸ் மேத்தாவை 5:0 என வீழ்த்தி, அரையிறுதிக்குள் நுழைந்தார். 51-54 கிலோ பிரிவு காலிறுதியில் பிரீத்தி, 5:0 என பஞ்சாப்பின் ஹர்மீத் கவுரை வென்றார். சாக்சி 4:1 என பூனமை சாய்த்தார்.

ஆண்கள் 65-70 கிலோ பிரிவு காலிறுதியில், உலக கோப்பையில் தங்கம் வென்ற ஹிதேஷ் குலியா, 5:0 என பஞ்சாப்பின் தேஜஸ்வியை சாய்த்தார். மற்ற போட்டிகளில் பவான் பார்ட்வல் (50-55 கிலோ), ஜடுமானி சிங் (50-55), சச்சின் (55-60) வெற்றி பெற்று, அரையிறுதிக்கு முன்னேறினர்.