இந்தியாவில், புரோ கபடி லீக் 11வது சீசன் நடக்கிறது. நேற்று, ஐதராபாத்தில் நடந்த லீக் போட்டியில் ஹரியானா, டில்லி அணிகள் மோதின. துவக்கத்தில் இருந்து ஆதிக்கம் செலுத்திய ஹரியானா அணியினர், டில்லி வீரர்களை 'ஆல்-அவுட்' செய்தனர். முதல் பாதி முடிவில் ஹரியானா அணி 24-13 என முன்னிலையில் இருந்தது.

இரண்டாவது பாதியில் எழுச்சி கண்ட டில்லி அணிக்கு 24 புள்ளி மட்டும் கிடைத்தது. ஆட்டநேர முடிவில் ஹரியானா அணி 41-34 என்ற கணக்கில் 2வது வெற்றி பெற்றது. ஹரியானா அணிக்கு முகமதுரேசா (10 புள்ளி), ஷிவம் (8), கேப்டன் ஜெய்தீப் (5) கைகொடுத்தனர். டில்லி அணி சார்பில் அஷு மாலிக் 13 புள்ளி பெற்றார்.

ஹரியானா அணி, இதுவரை விளையாடிய 3 போட்டியில், 2 வெற்றி, ஒரு தோல்வி என 10 புள்ளிகளுடன் 6வது இடத்துக்கு முன்னேறியது. டில்லி அணி 12 புள்ளிகளுடன் (2 வெற்றி, 2 தோல்வி) 5வது இடத்தில் உள்ளது.