மலேசியாவின் இபோ நகரில், சுல்தான் அஸ்லான் ஷா கோப்பை ஹாக்கி 31வது சீசன் நடந்தது. பைனலில் இந்தியா, பெல்ஜியம் அணிகள் மோதின. முதல் பாதி கோல் எதுவுமின்றி சமநிலையில் இருந்தது. இரண்டாவது பாதியில் எழுச்சி கண்ட பெல்ஜியம் அணிக்கு 34வது நிமிடத்தில் திபியூ ஸ்டாக்ப்ரூக்ஸ் ஒரு 'பீல்டு' கோல் அடித்தார். இதற்கு, கடைசி நிமிடம் வரை போராடிய இந்திய வீரர்களால் பதிலடி கொடுக்க முடியவில்லை.

ஆட்டநேர முடிவில் இந்திய அணி 0-1 என்ற கணக்கில் தோல்வியடைந்து, 4வது முறையாக (2008, 2016, 2019, 2025) 2வது இடம் பிடித்தது. பெல்ஜியம் அணி முதன்முறையாக கோப்பை வென்றது. இதன்மூலம் அஸ்லான் ஷா கோப்பை வென்ற 12வது அணியானது பெல்ஜியம்.

மூன்றாவது இடத்துக்கான போட்டியில் நியூசிலாந்து அணி 6-1 என்ற கோல் கணக்கில் மலேசியாவை வென்றது. ஐந்தாவது இடத்துக்கான போட்டியில் கனடா அணி 4-3 என தென் கொரியாவை வீழ்த்தியது.