நேபாள தலைநகர் காத்மாண்டுவில், தெற்காசிய யூத் டேபிள் டென்னிஸ் சாம்பியன்ஷிப் நடந்தது. இதில் 19 வயதுக்குட்பட்ட பெண்கள் அணிகளுக்கான பைனலில் இந்தியா, நேபாளம் மோதின. பிரிதா, அனன்யா, ஹர்தீ படேல், தியா இடம் பெற்ற இந்திய அணி 3-1 என்ற கணக்கில் வெற்றி பெற்று தங்கம் வென்றது.

பின், 15 வயதுக்குட்பட்ட பெண்கள் அணிகளுக்கான பைனலில் பிரீத்தி பால், ஆருஷி நந்தி, ஆத்விகா அராவல், தன்மயி சஹா இடம் பெற்ற இந்திய அணி 3-0 என இலங்கையை வீழ்த்தி தங்கத்தை தட்டிச் சென்றது.

அடுத்து நடந்த 19 வயதுக்குட்பட்ட ஆண்களுக்கான தனிநபர் பைனலில் இந்தியாவின் குஷால் சோப்தா 3-1 என சகவீரர் பாலமுருகனை வென்றார். 19 வயதுக்குட்பட்ட பெண்களுக்கான தனிநபர் பைனலில் இந்தியாவின் அனன்யா 3-1 என பிரிதாவை வீழ்த்தி தங்கம் வென்றார்.

இரட்டையரில் (15, 19 வயது) ஆதிக்கம் செலுத்திய இந்திய நட்சத்திரங்கள் 6 தங்கத்தையும் தட்டிச் சென்றனர்.

இத்தொடரில் இந்தியாவுக்கு 13 தங்கம், 3 வெள்ளி என, மொத்தம் 16 பதக்கம் கிடைத்தது.