செர்பியாவில், 23 வயதுக்கு உட்பட்டோருக்கான உலக மல்யுத்தம் சாம்பியன்ஷிப் தொடர் நடந்தது. பெண்களுக்கான 'பிரீஸ்டைல்' 53 கிலோ பிரிவு பைனலில் இந்தியாவின் ஹன்சிகா லம்பா, ஜப்பானின் ஹாருணா மோரிகாவா மோதினர். இதில் ஹன்சிகா 0-4 என்ற கணக்கில் தோல்வியடைந்து வெள்ளி வென்றார்.

பின், 59 கிலோ பிரிவு பைனலில் இந்தியாவின் சரிகா, ஜப்பானின் ருகா நடாமி மோதினர். இதில் சரிகா 1-3 என தோல்வியடைந்து வெள்ளிப் பதக்கத்தை கைப்பற்றினார்.

பெண்கள் 'பிரீஸ்டைலில்' மற்ற எடைப்பிரிவில் இந்தியாவின் நிஷு (55 கிலோ), நேஹா (57), புல்கிட் (65), ஸ்ரீஷ்டி (68), பிரியா (76) வெண்கலம் வென்றனர்.

இம்முறை 2 வெள்ளி, 5 வெண்கலம் என, 7 பதக்கம் கைப்பற்றிய இந்திய பெண்கள் அணி, 121 புள்ளிகளுடன் முதன்முறையாக ஒட்டுமொத்த சாம்பியன் பட்டம் வென்று வரலாறு படைத்தது. ஐந்து முறை சாம்பியன் பட்டம் வென்ற ஜப்பான் அணி (117) 2வது இடம் பிடித்தது.