தேசிய விளையாட்டு உத்தரகாண்ட்டில் நடக்கிறது. ஆண்களுக்கான 'டிரிபிள் ஜம்ப்' போட்டி நேற்று நடந்தது. தமிழக வீரர் பிரவீன் சித்ரவேல், 16.50 மீ., நீளம் தாண்டி தங்கப்பதக்கம் கைப்பற்றினார்.

தமிழகத்தின் மற்றொரு வீரர் முகமது சலாஹுதீன், 16.01 மீ., தாண்டி, வெள்ளிப்பதக்கம் வென்றார். கேரளாவின் முகமது முஹாசின் (15.57 மீ.,) வெண்கலம் வசப்படுத்தினார்.

ராகுல் 'வெள்ளி'

ஆண்களுக்கான 200 மீ., ஓட்டத்தில் தமிழக வீரர் ராகுல் குமார் (21.06 வினாடி), நிதின் (21.07) இரண்டு, மூன்றாவது இடம் பிடிக்க, வெள்ளி, வெண்கலப் பதக்கம் கிடைத்தன. ஒடிசா வீரர் அனிமேஷ் (20.58) தங்கம் வென்றார். பெண்களுக்கான 'ஹெப்டத்லான்' போட்டியில் தமிழகத்தின் தீபிகா, வெண்கலம் கைப்பற்றினார்.

டென்னிசில் தங்கம்

டென்னிஸ் கலப்பு இரட்டையர் பைனலில் தமிழகத்தின் அக்ஸ் பத்ரிநாத், லட்சுமி பிரபா ஜோடி, 6-4, 6-1 என கர்நாடகாவின் நிக்கி, சோகா ஜோடியை வீழ்த்தி தங்கம் கைப்பற்றியது. ஆண்கள் ஒற்றையர் பிரிவு அரையிறுதியில் தோற்ற தமிழக வீரர் மணிஷ் சுரேஷ் குமார், கர்நாடகாவின் பிரஜ்வலுக்கு வெண்கலம் கிடைத்தது. சர்வீசஸ் வீரர் இஷாக் இக்பால், 3-6, 6-4, 7-6 என போராடி, குஜராத்தின் ஜாவியாவை சாய்த்து தங்கம் வென்றார்.

வைதேகி அபாரம்

பெண்கள் ஒற்றையர் பைனலில் குஜராத்தின் வைதேகி, 6-4, 6-4 என நேர் செட்டில் மகாராஷ்டிராவின் ஜீல் தேசாயை வென்று தங்கப்பதக்கம் கைப்பற்றினார்.

அரையிறுதியில் வீழ்ந்த ஆகான்ஷா (மகாராஷ்டிரா), ஆமோதினி (கர்நாடகா), வெண்கலப் பதக்கம் பெற்றனர்.

ஜோதி அசத்தல்

பெண்களுக்கான 200 மீ., ஓட்டத்தில் ஆந்திராவின் ஜோதி, பந்தய துாரத்தை 23.35 வினாடியில் கடந்து, தொடர்ந்து இரண்டாவது முறையாக தங்கம் வென்றார். கர்நாடகாவின் உன்னாதி (23.70), தெலுங்கானாவின் நித்யா (23.76) வெள்ளி, வெண்கலம் வென்றனர்.

9 பேரும் சாதனை

பெண்களுக்கான 10 கி.மீ., நடை பந்தயம் நேற்று நடந்தது. மொத்தம் 11 பேர் பங்கேற்றனர். 2 பேர் பாதியில் விலகினர். ஹரியானாவின் ரவினா (45.52 நிமிடம்), தேசிய சாதனையுடன் தங்கம் வென்றார். இதற்கு முன் 1999ல் மணிப்பூரின் பாலா தேவி (51.56) முதலிடத்தில் இருந்தார்.

அடுத்து வந்த உத்தரகாண்ட் வீராங்கனைகள் ஷாலினி (46.12), பயல் (47.36), மான்சி (48.32), உ.பி.,யின் முனிதா (46.23), ரேஷ்மா (48.16), மோகவி (46.23, தமிழகம்), சேஜல் (49.33 மகாராஷ்டிரா), மோனிகா (51.45, ஹரியானா) என 8 பேரும் தேசிய சாதனை படைத்தனர்.

74 பதக்கம்

தேசிய விளையாட்டில் 14 நாள் முடிந்த நிலையில், இதுவரை தமிழகம் 21 தங்கம், 26 வெள்ளி, 27 வெண்கலம் என மொத்தம் 74 பதக்கம் வென்று, 6வது இடத்தில் உள்ளது. சர்வீசஸ் அணி (49 தங்கம், 18 வெள்ளி, 19 வெண்கலம் என 86) முதலிடத்தில் உள்ளது.