போர்ட் லாடர்டேல்: அமெரிக்காவில் நடக்கும் மேஜர் லீக் கால்பந்து (எம்.எல்.எஸ்.,) 'பிளே-ஆப்' போட்டியில் இன்டர் மயாமி, நியூயார்க் சிட்டி அணிகள் மோதின. மெஸ்ஸியின் இன்டர் மயாமி அணி 5-1 என வெற்றி பெற்று பைனலுக்கு முன்னேறியது.

டென்மார்க் முன்னேற்றம்

ரோட்டர்டாம்: ஜெர்மனி, நெதர்லாந்தில், பெண்களுக்கான உலக ஹேண்ட்பால் சாம்பியன்ஷிப் 27வது சீசன் நடக்கிறது. இதன் லீக் போட்டியில் டென்மார்க், குரோஷியா அணிகள் மோதின. டென்மார்க் அணி 35-24 என்ற கணக்கில் வெற்றி பெற்றது. ஏற்கனவே ஜப்பானை வீழ்த்திய டென்மார்க், 'மெயின்' சுற்றுக்கு முன்னேறியது.

பிரேசில் 'ஹாட்ரிக்'

பாசிக்: பிலிப்பைன்சில், பெண்களுக்கான உலக கோப்பை 'புட்சால்' கால்பந்து முதல் சீசன் நடக்கிறது. இதன் லீக் போட்டியில் பிரேசில், பனாமா அணிகள் மோதின. இதில் பிரேசில் அணி 9-0 என்ற கணக்கில் வெற்றி பெற்றது. ஏற்கனவே ஈரான், இத்தாலியை வீழ்த்திய பிரேசில், 'ஹாட்ரிக்' வெற்றியுடன் காலிறுதிக்குள் நுழைந்தது.

எக்ஸ்டிராஸ்

* பெங்களூருவில் நேற்று நடந்த 19 வயதுக்கு உட்பட்டோருக்கான முத்தரப்பு ஒருநாள் தொடரின் பைனலில் இந்தியா 'ஏ', ஆப்கானிஸ்தான் அணிகள் மோதின. மழையால் போட்டி பாதியில் ரத்து செய்யப்பட்டது.

* மும்பையில் நடந்த சுனில் வர்மா நினைவு ஸ்குவாஷ் 11வது சீசனுக்கான பைனலில் இந்தியாவின் சான்யா வாட்ஸ் 3-0 (11-6, 11-9, 11-4) என, சகவீராங்கனை நிருபமா துபேயை வீழ்த்தி கோப்பை வென்றார்.

* பிரிமியர் லீக் ('டி-20') தொடரில் இருந்து வெஸ்ட் இண்டீசின் ஆன்ட்ரி ரசல் 37, ஓய்வை அறிவித்தார். வரும் சீசனில் கோல்கட்டா அணியின் பயிற்சியாளர் குழுவில் இணைய உள்ளார்.

* சவுதி அரேபியாவில் நடந்த 'வேர்ல்டு ராலி சாம்பியன்ஷிப்-3' கார்பந்தயத்தில் இந்தியாவின் நவீன், முசா ஷெரிப் ஜோடி 2வது இடம் பிடித்து வரலாறு படைத்தனர்.