சென்னையில் ஆண்களுக்கான சேலஞ்சர் டென்னிஸ் தொடர் நடக்கிறது. இரட்டையர் பிரிவு முதல் சுற்றில் இந்தியாவின் சித்தாந்த், பரிக்சித் சோமானி ஜோடி, இந்தியாவின் விஷ்ணுவர்தன், சாய் கார்தீக் ஜோடியை எதிர்கொண்டது.

முதல் செட்டை சித்தாந்த்-சோமானி ஜோடி 6-3 என கைப்பற்றியது. அடுத்த செட்டை 3-6 என கோட்டை விட்டது. வெற்றியாளரை முடிவு செய்ய நடந்த 'சூப்பர் டை பிரேக்கரில்' சித்தாந்த்-சோமானி ஜோடி 10-7 என வசப்படுத்தியது. ஒரு மணி நேரம், 33 நிமிடம் நடந்த போட்டியின் முடிவில் சித்தாந்த்-சோமானி ஜோடி 6-3, 3-6, 10-7 என வெற்றி பெற்று, காலிறுதிக்கு முன்னேறியது.

ராமநாதன் ஏமாற்றம்

ஒற்றையர் பிரிவு முதல் சுற்றில் இந்தியாவின் ராம்குமார் ராமநாதன், பிரிட்டனின் ஜெய் கிளார்க் மோதினர். இதில் ராமநாதன் 3-6, 5-7 என்ற நேர் செட்டில் தோல்வியடைந்தார். மற்றொரு போட்டியில் இந்தியாவின் கரண் சிங், 3-6, 3-6 என பிரான்சின் ஜாக்குயட்டிடம் தோல்வியடைந்தார். இந்தியாவின் சசிக்குமார் முகுந்த், 3-6, 7-6, 1-6 என்ற செட் கணக்கில் ரஷ்யாவின் ஜகரோவிடம் போராடி வீழ்ந்தார்.