அமெரிக்காவின் நியூயார்க் நகரில் யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. பெண்கள் ஒற்றையர் பிரிவு 2வது சுற்றில் கஜகஸ்தானின் எலினா ரிபாகினா, ஸ்பெயினின் ஜெசிகா மனெய்ரோ மோதினர். இதில் ரிபாகினா 6-2, 6-4 என்ற நேர் செட் கணக்கில் வெற்றி பெற்றார்.

மற்றொரு 2வது சுற்றில் போலந்தின் இகா ஸ்வியாடெக் 6-3, 6-2 என, அர்ஜென்டினாவின் நாடியா போடோரோஸ்காவை வீழ்த்தினார். மற்றொரு போட்டியில் அமெரிக்காவின் கோகோ காப் 6-4, 7-6 என ஸ்பெயினின் பவுலா படோசாவை தோற்கடித்தார். ஜப்பானின் நவோமி ஒசாகா 6-2, 5-7, 6-1 என, செக்குடியரசின் கரோலினா சினியகோவாவை வென்றார்.

பிலிப்பைன்சின் அலெக்சாண்ட்ரா எலா 6-1, 6-4 என, உக்ரைனின் ஒலினிகோவாவை வீழ்த்தினார். மற்ற 2வது சுற்று போட்டிகளில் அமெரிக்காவின் அமண்டா அனிசிமோவா, மடிசன் கீஸ், ரஷ்யாவின் மிர்ரா ஆன்ட்ரீவா, பெல்ஜியத்தின் எலிஸ் மெர்டென்ஸ் உள்ளிட்டோர் வெற்றி பெற்றனர்.

ஸ்வெரேவ் அபாரம்: ஆண்கள் ஒற்றையர் பிரிவு 2வது சுற்றில் ஜெர்மனியின் அலெக்சாண்டர் ஸ்வெரேவ், பிரான்சின் குவென்டின் ஹாலிஸ் மோதினர். நான்கு மணி நேரம், 33 நிமிடம் நீடித்த போட்டியில் ஸ்வெரேவ் 6-4, 4-6, 7-6, 6-7, 6-3 என்ற கணக்கில் போராடி வெற்றி பெற்றார்.

மற்றொரு 2வது சுற்றில் அமெரிக்காவின் டெய்லர் பிரிட்ஸ் 6-0, 6-1, 6-1 என்ற நேர் செட் கணக்கில் இத்தாலியின் மட்டியா பெல்லுச்சியை வீழ்த்தினார்.

மற்ற 2வது சுற்று போட்டிகளில் கனடாவின் பெலிக்ஸ் ஆகர்-அலியாசிம், ஆஸ்திரேலியாவின் அலெக்ஸ் டி மினார், பிரான்சின் கேயல் மோன்பில்ஸ் தோல்வியடைந்து வெளியேறினர்.