அமெரிக்காவின் நியூயார்க் நகரில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. பெண்கள் ஒற்றையர் பிரிவு 2வது சுற்றில், 'நடப்பு சாம்பியன்' பெலாரசின் அரினா சபலென்கா, ரஷ்யாவின் போலினா இயாட்சென்கோ மோதினர். மொத்தம் 53 நிமிடம் நீடித்த போட்டியில் அசத்திய சபலென்கா 6-1, 6-1 என்ற நேர் செட் கணக்கில் வெற்றி பெற்று 3வது சுற்றுக்குள் நுழைந்தார்.

மற்றொரு 2வது சுற்றில் அமெரிக்காவின் ஜெசிகா பெகுலா 6-3, 6-1 என, சகவீராங்கனை சோபியா கெனினை தோற்கடித்தார். இத்தாலியின் ஜாஸ்மின் 6-4, 6-1 என, சகவீராங்கனை லுக்ரேசியாவை வென்றார். உக்ரைனின் எலினா ஸ்விடோலினா 6-2, 6-7, 6-4 என ஆஸ்திரேலியாவின் மாயாவை வீழ்த்தினார். உக்ரைனின் மார்டா கோஸ்டியுக் 6-1, 7-5 என அமெரிக்காவின் ஸ்லோன் ஸ்டீபன்சை வென்றார்.

மற்ற 2வது சுற்று போட்டிகளில் செக்குடியரசின் கரோலினா முசோவா, லிண்டா நோஸ்கோவா, அமெரிக்காவின் எம்மா நவரோ, டெய்லர் டவுன்சென்ட், ஸ்பெயினின் பவுலா படோசா உள்ளிட்டோர் வெற்றி பெற்றனர்.

அல்காரஸ் அசத்தல்: ஆண்கள் ஒற்றையர் பிரிவு 2வது சுற்றில் 'நடப்பு சாம்பியன்' ஸ்பெயினின் கார்லஸ் அல்காரஸ், போர்ச்சுகலின் ஜெய்மி பாரியா மோதினர். முதல் செட்டை 4-6 என இழந்த அல்காரஸ், பின் எழுச்சி கண்டு அடுத்த 3 செட்களை 6-0, 6-3, 6-2 என வென்றார். முடிவில் அல்காரஸ் 4-6, 6-0, 6-3, 6-2 என்ற கணக்கில் வெற்றி பெற்று 3வது சுற்றுக்கு முன்னேறினார்.

மற்றொரு 2வது சுற்றில் அமெரிக்காவின் பென் ஷெல்டன் 6-3, 5-7, 7-6, 7-5 என போலந்தின் ஹுபெர்ட் ஹுர்காச்சை வீழ்த்தினார்.

மற்ற 2வது சுற்று போட்டிகளில் ரஷ்யாவின் டேனியல் மெத்வெடேவ், அமெரிக்காவின் டாமி பால், கிரீசின் ஸ்டெபானஸ் சிட்சிபாஸ் உள்ளிட்டோர் வெற்றி பெற்றனர்.

'வில்-அம்பு' கொண்டாட்டம்

ஸ்பெயினின் கார்லஸ் அல்காரஸ், 2வது சுற்று போட்டி முடிந்த பின், 'கேலரியில்' அமர்ந்திருந்த தனது தம்பிகளை நோக்கி, 'வில் - அம்பு' எய்வது போல வெற்றியை கொண்டாடினார். இந்த வீடியோ சமூக வலைதளத்தில் வைரலானது.