அமெரிக்காவின் நியூயார்க் நகரில் யு.எஸ்., ஓபன் கிராண்ட்ஸ்லாம் டென்னிஸ் நடக்கிறது. பெண்கள் ஒற்றையர் நான்காவது சுற்றில் உலகின் 'நம்பர்-1' வீராங்கனை, போலந்தின் இகா ஸ்வியாடெக், 'நம்பர்-16' இடத்திலுள்ள ரஷ்யாவின் சம்சனோவாவை எதிர்கொண்டார். முதல் செட்டை 6-4 என வசப்படுத்திய ஸ்வியாடெக், அடுத்த செட்டை 6-1 என எளிதாக கைப்பற்றினார்.

ஒரு மணி நேரம், 31 நிமிடம் நடந்த போட்டியில் ஸ்வியாடெக் (6-4, 6-1) வெற்றி பெற்று, இத்தொடரில் இரண்டாவது முறையாக காலிறுதிக்கு முன்னேறினார்.

மற்றொரு நான்காவது சுற்றில் டென்மார்க்கின் வோஸ்னியாக்கி, பிரேசிலின் ஹதாத் மையாவுடன் மோதினார். இதில் வோஸ்னியாக்கி 2-6, 6-3, 3-6 என்ற செட் கணக்கில் தோல்வியடைந்தார்.

சின்னர் அபாரம்

ஆண்கள் ஒற்றையர் நான்காவது சுற்றில் உலகின் 'நம்பர்-1' வீரர் இத்தாலியின் ஜானிக் சின்னர், 'நம்பர் 14' வீரர், அமெரிக்காவின் டாமி பால் மோதினர். இதில் முதல் இரு செட்டுகளை 'டை பிரேக்கர்' சென்று, 7-6, 7-6 என போராடி வசப்படுத்தினார் சின்னர். அடுத்த செட்டில் 6-1 என எளிதாக வென்றார். முடிவில் சின்னர் 7-6, 7-6, 6-1 என்ற நேர் செட்டில் வெற்றி பெற்று, காலிறுதிக்குள் நுழைந்தார்.

அரையிறுதியில் போபண்ணா ஜோடி

கலப்பு இரட்டையர் பிரிவு காலிறுதியில் இந்தியாவின் போபண்ணா, இந்தோனேஷியாவின் அல்டிலா ஜோடி, ஆஸ்திரேலியாவின் மாத்யூ எப்டென், செக் குடியரசின் பார்பொரா கிரெஜ்சிகோவா ஜோடியை சந்தித்தது. இதில் போபண்ணா ஜோடி 7-6, 2-6, 10-7 என போராடி வென்று அரையிறுதிக்கு முன்னேறியது.