ஜெர்மனியில் ஏ.டி.பி., சர்வதேச டென்னிஸ் தொடர் நடக்கிறது. இதன் இரட்டையர் பிரிவு அரையிறுதியில் இந்தியாவின் யூகி பாம்ப்ரி, பிரான்சின் அல்பானோ ஜோடி, ஆஸ்திரியாவின் அலெக்சாண்டர் எர்லர், லுாகாஸ் மிட்லர் ஜோடியை எதிர்கொண்டது. முதல் செட்டை 6-1 என மிகச் சுலபமாக கைப்பற்றிய இந்தியா-பிரான்ஸ் ஜோடி, 'டை பிரேக்கர்' நீடித்த இரண்டாவது செட்டை 6-7 என போராடி இழந்தது.

வெற்றியாளரை நிர்ணயிக்கும் 'சூப்பர் டை பிரேக்கரில்' எழுச்சி கண்ட பாம்ப்ரி ஜோடி 10-7 என தன்வசப்படுத்தி பதிலடி கொடுத்தது. ஒரு மணி நேரம், 32 நிமிடம் நீடித்த போட்டியில் அசத்திய யூகி பாம்ப்ரி, அல்பானோ ஜோடி 6-1, 6-7, 10-7 என்ற கணக்கில் வெற்றி பெற்று பைனலுக்குள் நுழைந்தது.