திருக்கழுக்குன்றத்தில், அரசு மருத்துவமனை இயங்குகிறது. திருக்கழுக்குன்றம் மற்றும் சுற்றுப்புறத்தில் உள்ள, 20க்கும் மேற்பட்ட கிராமத்தினர், காய்ச்சல், விபத்து காயம் உள்ளிட்டவற்றுக்கு, இங்கு சிகிச்சை பெறுகின்றனர். காலை 11:30 மணி வரை, புறநோயாளிகள் குவிகின்றனர்.

கூட்டம் குறைந்த பின், சிகிச்சைக்காக வருபவர்களிடம், மாத்திரை மட்டும் வாங்கிக் கொள்ளுமாறும், மாலையில் தான் டாக்டரை சந்திக்க முடியும் என்றும் கூறி, பொதுமக்களை அலைக்கழிப்பதாக குற்றச்சாட்டு எழுந்துள்ளது.

நேற்று, காய்ச்சலால் அவதிப்பட்ட பள்ளி சிறுமியை, பகல் 1:00 மணிக்கு சிகிச்சைக்காக அழைத்துச் சென்றபோது, அவசரம் என்றால், மாத்திரை வாங்குமாறு அறிவுறுத்தி, டாக்டரை சந்திக்க, மாலை 3:00 மணிக்கு பிறகு வருமாறும் கூறி அலட்சியப்படுத்தியுள்ளனர்.

இது குறித்து உயரதிகாரிகள் ஆய்வு நடத்தி, சிகிச்சை நடைமுறையை முறைப்படுத்த வேண்டும் என, இப்பகுதியினர் வலியுறுத்துகின்றனர்.