மாதவரம் குறுவட்ட அளவிலான ஹாக்கி போட்டிகள், நேற்று முன்தினம், மணலி - அம்பேத்கர் கால்பந்து விளையாட்டு திடலில் நடைபெற்றது.

குறுவட்ட போட்டிகளுக்கான இணை செயலர் ரூபாவதி தலைமையில் நடந்த போட்டியில், சுற்றுவட்டார பள்ளிகளைச் சேர்ந்த மாணவ - மாணவியர் அணியினர் பங்கேற்று விளையாடினர்.

இதில், 14 வயதிற்குட்பட்ட ஆண்கள் மற்றும் பெண்கள், 17 வயதிற்குட்பட்ட ஆண்கள் மற்றும் பெண்கள் என, நான்கு பிரிவுகளில் சின்னசேக்காடு அரசு உயர்நிலைப் பள்ளி மாணவ - மாணவியர் அணியினர் முதலிடம் பிடித்தனர்.

தவிர, 19 வயதிற்குட்பட்ட ஆண்கள் மற்றும் பெண்கள் பிரிவில், மணலி அரசு மேல்நிலைப் பள்ளி மாணவ - மாணவியர் முதலிடம் பிடித்தனர்.

குறுவட்ட அளவிலான போட்டியில் முதலிடம் பிடித்த அணியினர், மாவட்ட அளவிலான போட்டியில் விளையாட தகுதி பெற்றுள்ளனர்.