திருப்போரூரில் பி.டி.ஓ., அலுவலக வளாகத்தில், ஊராட்சி ஒன்றிய அலுவலகம், மகளிர் திட்ட அலுவலகம், பொதுப்பணித்துறை அலுவலகம், வட்டார கல்வி வள மையம், ஒருங்கிணைந்த குழந்தைகள் வளர்ச்சித் திட்ட அலுவலகம், சிமென்ட் கிடங்கு ஆகியவை அமைந்துள்ளன.

வளாகம் முழுதும் சுற்றுச்சுவர் அமைக்கப்பட்டு, இரண்டு நுழைவாயில்கள் உள்ளன. இங்கு, பல்வேறு வேலைகளுக்காக, நுாற்றுக்கணக்கான பொதுமக்கள் வந்து செல்கின்றனர்.

இந்நிலையில், இந்த வளாகம் சரியான பராமரிப்பில்லாமல், மோசமான நிலையில் இருந்தது. ஆங்காங்கே முள் செடிகள் வளர்ந்து, குப்பைக் கழிவுகள் குவிந்து புதர் மண்டி கிடந்தது.

முக்கியமான அலுவலக வளாகத்தை துாய்மைப்படுத்த வேண்டும் என, அப்ப்குதிவாசிகள் கோரிக்கை வைத்தனர்.

இதையடுத்து, பி.டி.ஓ., அலுவலக நிர்வாகம் சார்பில், தொழிலாளர்கள் மற்றும் ஜே.சி.பி., இயந்திரம் வாயிலாக, வளாகத்தை சுற்றிலும் வளர்ந்த செடிகளை அகற்றி, துாய்மைப்படுத்தும் பணி நடந்து வருகிறது.