வண்டலுார் - -வாலாஜாபாத் சாலையானது சென்னை -- திருச்சி ஜி.எஸ்.டி., சாலை, வண்டலுார் -- மீஞ்சூர் வெளிவட்ட சாலை, சிங்கபெருமாள்கோவில் -- ஸ்ரீபெரும்புதுார் சாலையை இணைக்கும் சாலையாக உள்ளது.

ஒரகடம், வல்லம், ஸ்ரீபெரும்புதுார் பகுதியில் உள்ள சிப்காட் தொழிற்பூங்காக்களில் தொழிற்சாலைகளின் எண்ணிக்கை உயர்ந்து வருவதால், வண்டலுார் - -வாலாஜாபாத் சாலையில் வாகனப் போக்குவரத்து அதிகரித்து, நெரிசல் ஏற்படுகிறது.

நெரிசலை குறைக்க நான்குவழிச் சாலையான வண்டலுார் - வாலாஜாபாத் நெடுஞ்சாலையை ஆறுவழிச் சாலையாக விரிவுபடுத்தப்பட்டது.

இந்த சாலையில் படப்பை பஜாரில் 800க்கும் மேற்பட்ட வணிகக் கடைகள் உள்ளன. சாலை விரிவாக்கம் செய்ய நிலத்தின் மதிப்பீடு அதிகம் என்பதாலும், விரிவாக்கம் செய்ய வணிகர்கள் எதிர்ப்பு தெரிவித்ததால் படப்பை பஜாரில் சாலை விரிவாக்கம் செய்யப்படவில்லை. இதனால் கடும் போக்குவரத்து நெரிசல் ஏற்பட்டது.

படப்பை பஜார் பகுதியில் ஏற்படும் போக்குவரத்து நெரிசலைக் குறைக்க, 26.64 கோடி ரூபாய் மதிப்பில் மேம்பாலம் அமைக்கும் பணி, 2022, ஜனவரியில் துவங்கியது.

படப்பை பஜாரில் 690 மீட்டர் நிளம், 17.20 மீட்டர் அகலத்தில் அமையும் இந்த பாலத்தின் கட்டுமானப் பணிகளை, 18 மாதங்களில் முடிக்க காலம் நிர்ணயிக்கப்பட்டது. ஆனால், இரண்டு ஆண்டு, 10 மாதங்கள் கடந்த நிலையிலும், பாலம் கட்டுமானப் பணி நிறைவடையவில்லை.

மந்த கதியில் நடக்கும் பாலம் கட்டுமானப் பணியால், படப்பையில் போக்குவரத்து நெரிசல் வழக்கத்தைவிட இரு மடங்கு அதிகரித்துள்ளது.

அதுமட்டுமின்றி, வண்டலுார்- - வாலாஜாபாத் நெடுஞ்சாலையில் ஜல்லி, பாறைக்கற்கள் உள்ளிட்ட கட்டுமானப் பொருட்களை ஏற்றிக்கொண்டு அதிக அளவில் கனரக லாரிகள் செல்கின்றன.

இதனால், படப்பையில் நெரிசலும், அடிக்கடி விபத்தும் ஏற்படுகிறது. நெரிசலை கட்டுப்படுத்த படப்பை பஜாரில் பாலம் கட்டுமானப் பணி முடியும் வரை, 'பீக் ஹவர்ஸ்' நேரமான காலை 8:00 மணி முதல், 10:00 மணி வரை, மாலை 6:00 முதல், இரவு 8:00 மணி வரை, கனரக வாகனங்கள் நுழைய தடை விதிக்கப்பட்டது. ஆனாலும், இதை மதிக்காத லாரிகள் 24 மணி நேரமும் செல்கின்றன.

மேலும், ஒரகடம், வல்லம், ஸ்ரீபெரும்புதுார் சிப்காட்டில் உள்ள தொழிற்சாலைகளுக்கு ஊழியர்களை ஏற்றிச் செல்லும் பேருந்துகள் ஒரே நேரத்தில் அதிக அளவில் செல்வதால், படப்பையில் 2 கி.மீ., துாரத்திற்கு வாகனங்கள் நெரிசலில் சிக்கி காலை மாலை நேரங்களில் அணிவகுத்து நிற்கின்றன.

பாலம் கட்டுமானப் பணிக்காக சாலையின் நடுவே தடுப்புகள் அமைக்கப்பட்டன. இதனால், சாலை குறுகலாக மாறியதால், படப்பை பஜாரில் போக்குவரத்து நெரிசல் வழக்கத்தைவிட இரு மடங்கு அதிகரித்தது.

நெரிசலை கட்டுப்படுத்த, பாலம் கட்டுமானப் பணி நடக்கும் இடத்தின் அருகே இருந்த பேருந்து நிறுத்தம், வேறு பகுதிக்கு மாற்றப்பட்டது. இந்நிலையில், படப்பை பஜார் பகுதி வழியே தினமும் ஏராளமான கனரக லாரிகள் செல்வதால், நாள் முழுக்க நெரிசல் ஏற்படுகிறது.

மேலும் அடிக்கடி விபத்துகளும் நடக்கின்றன. இதனால், படப்பையில் போக்குவரத்து நெரிசல் தீராத தலைவலியாக உள்ளது.

எனவே, பாலப்பணி நிறைவடையும் வரை, பகல் நேரத்தில் படப்பை பஜார் வழியே கனரக லாரிகள் செல்ல தடை விதிக்க வேண்டும். தொழிற்சாலை பேருந்துகள் ஒரே நேரத்தில் செல்லாமல் குறிப்பிட்ட இடைவெளியில் செல்ல நடவடிக்கை எடுக்க வேண்டும் என சமூக ஆர்வலர்கள் எதிர்பார்க்கின்றனர்.

இதுகுறித்து நெடுஞ்சாலைத் துறை அதிகாரிகளிடம் கேட்டபோது, 'பாலம் கட்டுமானப் பணி 50 சதவீதம் முடிந்து விட்டது. எஞ்சியுள்ள பணிகளை நான்கு மாதங்களில் முடிக்க திட்டமிட்டு உள்ளோம்' என்றனர்.