மதுராந்தகம் ஏரிக்கரையில் இருந்து மாம்பாக்கம் ரயில்வே பாலம் வரை, கழிவுநீர் கால்வாய் அமைக்கப்பட்டுள்ளது.

ஆனால், கான்கிரீட் கால்வாயாக அமைக்காததால், பல இடங்களில் அடைப்பு ஏற்பட்டு, கழிவுநீர் தேங்கியது.

குறிப்பாக, மதுராந்தகம் நகரில், ஹிந்து சமய அறநிலைய துறைக்குச் சொந்தமான கோவில் நிலம் உள்ள பகுதியில், இந்த கழிவுநீர் கால்வாயில் மண் சரிவு ஏற்பட்டுள்ளது.

இதன் காரணமாக, கழிவுநீர் வெளியேற வழியின்றி தேங்கியது. அதில் பிளாஸ்டிக் குப்பையும் குவிந்திருந்ததால் பன்றிகள் கிளறி கடும் துர்நாற்றம் வீசியது.

கழிவுநீர் விரைந்து வெளியேறும் வகையில், நிரந்தர தீர்வாக கான்கிரீட் கழிவுநீர் கால்வாய் அமைக்க, நகராட்சி நிர்வாகம் நடவடிக்கை எடுக்க வேண்டும் என, நம் நாளிதழில் செய்தி வெளியானது. இதையடுத்து நேற்று, கழிவுநீர் கால்வாயில் இருந்த குப்பையை அகற்றி, துார்வாரி சீரமைக்கப்பட்டது.