நடத்துனர், ஓட்டுனர்கள் திடீர் போராட்டம்

பூந்தமல்லியில் இருந்து சுங்குவார்சத்திரம் நோக்கி, நேற்று காலை 9:30 மணிக்கு, தடம் எண்: 578 என்ற அரசு பேருந்து சென்றுக் கொண்டிருந்தது. பேருந்தில், பள்ளி மாணவ - மாணவியர் பலர் படியில் தொங்கியபடி பயணித்தனர்.படியில் நின்றிருந்த மாணவர்களை, பேருந்தினுள் ஏறும்படி, நடத்துனர் நாராணயணசாமி எச்சரித்து வந்துள்ளார்.பேருந்து, இருங்காட்டுக்கோட்டை அருகே சென்றபோது, படியில் இருந்த மாணவரை உள்ளே செல்லுமாறு, நடத்துனர் நாராயணசாமி கண்டித்துள்ளார்.
அப்போது, அங்கிருந்த 42 வயதுடைய நபர், நடத்துனரை கடுமையாக தாக்கி, அங்கிருந்து தப்பி ஓடினார். இதையடுத்து, பேருந்தை நிறுத்தி, நடத்துனர், ஓட்டுனர் போராட்டத்தில் ஈடுபட்டனர். பின்னால் வந்த அரசு மாநகர பேருந்து ஓட்டுனர்களும், பேருந்துகளை நிறுத்தி, போராட்டத்தில் குதித்தனர். இதனால், அப்பகுதி பரபரப்பானது. தேசிய நெடுஞ்சாலையில் கடும் போக்குவரத்து நெரிசல் ஏற்பட்டது.தகவலறிந்த ஸ்ரீபெரும்புதுார் போலீசார், சம்பவ இடத்திற்கு விரைந்து வந்து, நடத்துனர் மற்றும் ஓட்டுனர்களிடம் பேச்சு நடத்தினர்.இதையடுத்து, அரை மணி நேரத்திற்கு மேலாக நீடித்த போராட்டம் முடிவுக்கு வந்தது. மற்ற பேருந்துகள் புறப்பட்டு சென்றன.
பாதிக்கப்பட்ட நடத்துனர் நாராயணசாமி, பேருந்துடன் சென்று ஸ்ரீபெரும்புதுார் காவல் நிலையத்தில் புகார் அளித்தார். பயணியர், மாற்று பேருந்தில் சுங்குவார்சத்திரத்திற்கு அனுப்பி வைக்கப்பட்டனர்.ஸ்ரீபெரும்புதுார் அரசு மருத்துமனையில் நாராயணசாமி சிகிச்சை பெற்று வருகிறார். 42 வயதுடைய நபரை பிடித்து, போலீசார் விசாரிக்கின்றனர்.அதேபோல், பிராட்வேயில் இருந்து கண்ணதாசன் நகருக்கு புறப்பட்ட தடம் எண்: '33சி' அரசு பேருந்தில், மூன்று வாலிபர்கள் நேற்று முன்தினம் இரவு ஏறினர்.ஏறியதில் இருந்து பயணியருக்கு தொந்தரவாக பாட்டு பாடி, கூரையை தட்டியபடி வந்தனர்.
பேருந்து ஓட்டுனர் கணேசன், 58, அறிவுரை வழங்கியும், அந்த மூன்று பேரும் அட்டகாசத்தை தொடர்ந்து செய்து வந்தனர்.வாலிபர்கள் சேட்டை குறித்து, ஓட்டுனர் கணேசன், அப்பகுதி போலீசாருக்கு மொபைல் போனில் தகவல் அளித்தார்.ரோந்து பணியில் இருந்த போலீசார், உடனே பிராட்வே நிலையத்திற்கு வந்து, மூவரையும் எச்சரித்து, பேருந்தில் இருந்து இறக்கிவிட்டனர். இதையடுத்து, பேருந்து புறப்பட்டு சென்று கொண்டிருந்தது.
வியாசர்பாடி, முல்லை நகர் நிறுத்தத்தில் மாநகர பேருந்து நிற்கும்போது, பின்னால் தொடர்ந்து வந்த அந்த மூவரும், பேருந்தினுள் ஏறி கணேசனை சரமாரியாக கையால் தாக்கி தப்பினர்.இது குறித்து எம்.கே.பி.நகர் போலீசார், நேற்று வழக்கு பதிந்து, வியாசர்பாடி, எம்.ஜி.ஆர்.நகர், 1வது தெருவைச் சேர்ந்த ராகேஷ், 18, கொடுங்கையூர், சஞ்சய்காந்தி நகரை சேர்ந்த நாராயணன், 18, கொடுங்கையூர், திருவள்ளூர் நகரை சேர்ந்த அய்யனார், 20, ஆகிய மூவரையும் கைது செய்தனர்.