செங்கல்பட்டு புறநகர் பகுதிகளில், வளர்ந்து வரும் முக்கியமான நகரங்களில் சிங்கபெருமாள் கோவில் முதன்மையானது. கடந்த 15 ஆண்டுகளில் சிங்கபெருமாள் கோவில் மற்றும் அதைச் சுற்றியுள்ள கிராமங்கள் நல்ல வளர்ச்சி அடைந்து உள்ளன.

இங்கு கோவில்கள், வங்கிகள், தனியார் மருத்துவமனைகள், ரயில் நிலையம், அடுக்கு மாடி குடியிருப்புகள் உள்ளிட்டவை உள்ளன. தமிழகத்தின் பல்வேறு பகுதிகளில் இருந்து பல்லாயிரக்கணக்கான ஆண்கள், பெண்கள் இங்கு வாடகைக்கு தங்கி மறைமலைநகர், மகேந்திரா சிட்டி, ஒரகடம் பகுதிகளில் உள்ள தொழிற்சாலைகளில் பணிபுரிந்து வருகின்றனர்.

சிங்கபெருமாள் கோவில் மற்றும் அதைச் சுற்றியுள்ள கிராமங்கள், தாம்பரம் போலீஸ் கமிஷனரகம் கட்டுப்பாட்டில் உள்ள மறைமலைநகர் காவல் நிலைய எல்லையில் உள்ளன.

இதை தனியாக பிரித்து, சிங்கபெருமாள் கோவிலில் புதிய காவல் நிலையம் அமைக்க வேண்டும் என, இப்பகுதி மக்கள் நீண்ட நாட்களாக கோரிக்கை விடுத்து வந்தனர்.

இதையடுத்து, 2023 மார்ச் மாதம், புதிய காவல் நிலையம் அமைக்க, தமிழக அரசு அறிவிப்பு வெளியிட்டது. அறிவிப்பு வெளியாகி பல மாதங்கள் கடந்த நிலையில், இதுவரை காவல் நிலையம் அமைக்கும் பணிகள் துவக்கப்படவில்லை.

இது குறித்து, சமூக ஆர்வலர்கள் கூறியதாவது:

சிங்கபெருமாள் கோவில் பகுதி திருச்சி -- சென்னை தேசிய நெடுஞ்சாலையை ஒட்டி உள்ள பகுதியில், முக்கிய சந்திப்புகளில் அடிக்கடி விபத்துக்கள் மற்றும் போக்குவரத்து நெரிசல் ஏற்படுகின்றன.

மேலும் இருசக்கர வாகனங்கள் திருட்டு, மொபைல் போன் திருட்டு, வழிப்பறி உள்ளிட்டவை இரவு நேரங்களில் அடிக்கடி நடைபெற்று வருகின்றன.

சுற்றியுள்ள கிராமங்களில் பரவலாக கஞ்சா விற்பனையும் அதிகரித்து வருகிறது. சமீபத்தில் கஞ்சா விற்பனை தொடர்பாக சரவணன் என்ற இளைஞர் படுகொலை செய்யப்பட்டார்.

அதே போல கடந்த 15 ஆண்டுகளில், தி.மு.க., - அ.தி.மு.க., முக்கிய பிரமுகர்கள் உட்பட, 25க்கும் மேற்பட்டோர் படுகொலை செய்யப்பட்டு உள்ளனர். மறைமலைநகர் காவல் நிலைய எல்லையில், 2022ம் ஆண்டு 5 கொலைகளும், 2023ல் ஏழு கொலைகளும், 2024 மற்றும் 2025ல் தலா ஒரு கொலையும் நடைபெற்று உள்ளன.

இப்பகுதி மக்கள் குற்றச் சம்பவம், பாதுகாப்பு குறித்து புகார் தெரிவிக்க, 7 கி.மீ., துாரம் சென்று மறைமலைநகர் காவல் நிலையத்தில் புகார் அளிக்க வேண்டி உள்ளது.

இதனால், வீண் அலைச்சலும் ஏற்பட்டு வருகிறது. சிங்கபெருமாள் கோவிலில், ஐந்திற்கும் மேற்பட்ட அரசு கட்டடங்கள் உரிய பராமரிப்பு இல்லாமல், வீணாகி வருகின்றன.

இவற்றில் ஏதேனும் ஒரு கட்டடத்தை காவல் நிலையம் தற்காலிகமாக செயல்படும் வகையில் மாற்றி நடவடிக்கை எடுக்க, காவல் துறை உயரதிகாரிகள் நடவடிக்கை எடுக்க வேண்டும்.

இவ்வாறு அவர்கள் கூறினர்.