விபத்துகள் தாராளம்

இதுகுறித்து, சமூக ஆர்வலர்கள் கூறியதாவது: செங்கல்பட்டு முதல் பெருங்களத்துார் வரையிலான ஜி.எஸ்.டி., சாலையின் இருபுறமும், 200க்கும் மேற்பட்ட ராட்சத விளம்பர பேனர்கள் வைக்கப்பட்டு உள்ளன. தனியார் பள்ளிகள், கல்லுாரிகள், ரியல் எஸ்டேட் நிறுவனங்கள், நொறுக்கு தீனி நிறுவனங்கள், மருத்துவமனைகள், காப்பீடு நிறுவனங்கள், ஐஸ் கிரீம் நிறுவனங்கள் சார்பில், இதுபோன்ற விளம்பரங்கள் வைக்கப்பட்டு உள்ளன.
சாலையில் பயணிக்கும் வாகன ஓட்டிகளை, மேற்கண்ட விளம்பரங்களில் ஏதாவது ஒன்று, நிச்சயம் கவர்ந்திழுக்கிறது. இதனால் விபத்துகள் ஏற்படுகின்றன. இதுபோன்ற நிகழ்வுகளால், தினமும் 10 இடங்களிலாவது வாகன ஓட்டிகளிடையே வாய்த்தகராறு மற்றும் கைகலப்பு நிகழ்கிறது. தவிர, சிறு சிறு விபத்துகளும் தாராளமாய் நடந்து வருகின்றன.
மேலும், பெரும் விபத்தில் சிக்கி, உயிர் பலியும் மாதந்தோறும் நிகழ்கிறது. இந்த விளம்பர பேனர்கள் முறையான அங்கீகாரம் பெறப்பட்டு வைக்கப்பட்டு உள்ளதா என்பது, கேள்விக்குறியாக உள்ளது. விளம்பர பேனர்களை அகற்ற அதிகாரிகள் உரிய நடவடிக்கை எடுக்க வேண்டும். இவ்வாறு அவர்கள் கூறினர்.

பேனரால் பாதிப்பு, உயிரிழப்பு
கடந்த 2019ம் ஆண்டு, சென்னை பள்ளிக்கரணையில் சுபஸ்ரீ, 23, என்ற பெண் மீது பேனர் சரிந்து விழுந்தது. கீழே விழுந்த அவர் மீது, லாரி ஏறியதில் பலியானார்.
கடந்த ஜூன் மாதம், சென்னை அடுத்த கேளம்பாக்கம், படூர் ஆறுவழிச் சாலை ஓரம் வைக்கப்பட்டிருந்த,'பிளக்ஸ் பேனர்' காற்றில் சரிந்து விழுந்ததில், மேற்கு வங்கத்தைச் சேர்ந்த குப்தா, 42, என்பவர் படுகாயம் அடைந்தார்.