கள்ளக்குறிச்சியைச் சேர்ந்தவர் அருண்குமார், 32; லாரி ஓட்டுனர். நேற்று, காஞ்சிபுரத்தில் இருந்து அரிசி மூட்டைகளை லாரியில் ஏற்றிக் கொண்டு, மீஞ்சூர் வழியாக மணலி சென்றார்.

இந்த நிலையில், 'கூகுள் மேப்' காட்டிய பாதையால், மணலி செல்ல வேண்டிய லாரி, எண்ணுார், காமராஜர் நகர் - ரயில்வே சுரங்கபாதைக்குள் சென்ற போது சிக்கி கொண்டது.

இதனால், எண்ணுாரில் போக்குவரத்து கடுமையாக பாதிக்கப்பட்டது.

தகவலறிந்த, எண்ணுார் போக்குவரத்து காவல் உதவி ஆய்வாளர் சீனிவாசன் தலைமையிலான போலீசார், சம்பவ இடத்திற்கு விரைந்து சென்று, பொக்லைன் உதவியுடன் லாரியை மீட்டு வெளியேற்றினர்.

இதன் காரணமாக, எண்ணுார் - கத்திவாக்கம் நெடுஞ்சாலை, எண்ணுார் விரைவு சாலையில், ஒரு மணி நேரம் போக்குவரத்து பாதிக்கப்பட்டது.